السلام عليكم ورحمة الله وبركاته …
الموضوع مثل ما شفتوه ( غلاء المهور حججججة)
بصراحة استغرب من المواضيع اللي تنطرح وتتكلم عن غلاء المهور وتهاجم البنت وأهلها مع أن المهر من التسعينات واقف ما بين 70 ألف – و 100 ألف درهم كأقصى حد ، مع وجود بعض المبالغة لدى بعض العائلات اللي تطلب مئات الآلاف .. وهاذيل ما يمثلون نسبة كبيرة يمكن 0,1% .. وبنفس الوقت في عائلات الى اليوم تترك للراغب في الزواج حرية تقدير المهر.
وأتذكر كل الزيجات اللي تمت مثلا في محيطنا سواء من العائلة أو الجيران أو المعارف أو الصديقات أو زميلات الدراسة أو العمل الخ ما تعدت الـ 70 ألف درهم اللي يصرفها صندوق الزواج ( يعني ما يتحملها الزوج ) ..
ويوم أقارن أقدم زيجة أتذكرها في الوسط العائلي في عام 1992 وأحدث زيجة تمت العام الماضي 2008 المهر فيها نفس ماهو 70,000 درهم يعني هالرقم ( خلال 17 سنة وأكثر) ما تغير وايد و (تقريبا) ثابت ( وين الغلا اللي تتكلمون عنه؟؟)
يمكن حد يقول 70 ألف درهم مبلغ كبير بعض الشئ ان البنت تجهز نفسها به بس تستحق لأنها في النهاية ما بتاخذه بيت أبوها ان اشترت لبس ولا ذهب ولا حتى خلته في البنك في النهاية… كله لزوجها وبيتها ومب شوية عليها لأن الشباب اليوم يصرفون هالمبلغ وأكثر منه على أشياء كمالية وهالرقم (70 ألف) خاضع لموافقة الدولة اللي قدرت مصاريف تجهيز البنت للزواج بـ هالقيمة وبالتالي تصرفه من خلال صندوق الزواج!
يعني كأنه البنت ما خذت من الريال شي كأنه الدولة هي اللي عطتها اياه.. وغيره من المصاريف هي بسبة جشع التجار .. وغطرسة بعض البنات اللي تبا الغالي .. وهذا شي ما نقدر نعممه على الجميع !!
والغلا تحديدا في صالات الأعراس ، في الكوش ، في الفساتين ، والمكياج يعني باختصار التجار هم السبب؟ وللأسف لو بني عند أصحاب الصالات فهم مواطنين ، الممكيجات مواطنات، مؤجرين ومؤجرات الفساتين أغلبهم مواطنين .. الخ
في الدول الغير خليجية مثلا فستان العرس ما يكلف 1000 درهم بينما عندنا في الامارات اذا الفستان أبيض حط صفر اضافة الى الـ 1000 لأنه أبيض وهذا بس للتأجير مب للشراء .. لكن لو كان لونه مثلا بني بيكون سعره في المتوسط 2000 درهم.
يعني لا تلومون البنت ولا أهلها في هالموضوع لأن جشع التجار الغير محكوم بأحكام ولا توجد حماية للمستهلك هو السبب..
والتجار ( المختصين بالأعراس ) لا لهم ولا عليهم بعيدين عن هذا الهجوم ..
ياريت تخففون الهجوم على البنت وأهلها و تبطلون تعيبون في بنت الامارات ، لأنكم في النهاية طرف في الموضوع ، يعني كل واحد في النهاية عنده بنت وأخت للزواج فأنت باجر بتكون أب لـ البنت اللي تناقش قضيتها اليوم وتقول أهلها بالغو في المهر يعني انت سبب وطرف فـ مافي داعي تبعدون نفسكم كطرف مهم في هالمشكلة …
أحد الاخوان طلب نخطب له ولقينا بنت الحلال اللي تستوفي كل الشروط وبأقل مهر .. طلع حجج واهية وحطنا في موقف محرج مع البنت وأهلها وآخر شي يقولون المواطنات والمواطنات !!
كل أخ وكل أب فيكم يقدر ينصح ، ويقنع، ويتدخل في موضوع المهر نفسه وموضوع الاعداد للعرس والمغالاة اللي نعيد ونزيد فيها ..
ولا كل واحد اليوم بيناقش القضية ويبا يتزوج ويبا يخففون عليه المهر ويوم يرزقه الله ببنت بيقول بنتي غالية وما بزوجها الا اللي يدفع فيها ( الشي الفلاني) !
اختي شووووووووو رايج بموضوووووووع المظاهر في الزواج ماله دوووووووووووووووووور بنسبه للبنات طبعا اتكلم عن البعض
اقلهم مهرا اكثرهم بركه
وهل قله المهر و قله تكاليف الزواج يقلل من مكانه وقيمه البنت ؟
تسلمين اختي
والهدف تغيير الفكرة الراسخة في العقول على أن المغالاة هي بسبب البنت وأهلها
هي مجرد ديباجة حفظوها ” بعض ” الشباب وكل ما فكرو بالعرس قالو المهر غالي بدون ما يفكرون
هل فعلا المهر هو اللي غالي ولا الحياة غلت ..
وبدون ما يتعبون عمارهم شوي ويوفرون فلوس العرس بدل اللعبان ( طبعا طبعا مب الكل )..
اللي يبا بنت البلاد حياه الله ،
ما عندها أغلى من ولد بلادها مهما تعالى عليها ونكرها
واللي يبا الأجنبية الله يسهل دربه .. كل واحد ياخذ اللي توالمه ..
بس لا يتحججون بأن البنت وأهلها يطالبون بمهور غالية .. هم اللي ما يبون بنات البلاد
وخلاف يقولون .. مهرها غالي وخقاقة ومتكبرة ..
اذا بنعمم تصرف شخص على الكل ، عيل نحن بعد بنقول شبابنا خقاقين وأصحاب مظاهر
بس الله خلق الزين مثل ما خلق الشين ..
وعلى نياتكم ترزقون
طرح رائع ومميز…
سلمتي وسلم غاليج..
ويا حبذا لو يثبت الموضوع..
انا حصرت الموضوع على تجار تجهيزات الزواج ..
أما بقية الأمور من متطلبات الحياة ما بنتكلم فيها في هالموضوع اكيد لأن هاي هي الحياة وهاي هي العيشة وها المستوى المعيشي لدولة الامارات .. او مثل ما نقول هجذه الحياة ماشية عندنا ..
صار كل شي غالي ..
بس موضوع المهور بالتحديد يرجعون السبب فيه للبنت وأهلها مب معقولة ان الكل مغالين في المهور ..
وبنات البلاد بنات خير يعني الوحدة ما تقصر ويا ريلها يوم عندها خير وأغلب الموظفات يساعدن رياييلهن حتى في ديون الزواج .. الا القلة طبعا .. أعرف موظفات يبن يستقيلن يجابلن بيوتهن بس رابطتنهن الحاجة ويساعدن رياييلهن في بنا البيوت ..
الله يكون في عون التجار..حتى هم مســئولين عن عــزوف الشباب للزواج..
.
.
تـرى مشكلة الزواج و متطلباته في كل دول العالم..الدنيا تغيريت..و ضروريات الحياة مب مثل قبل..
كنا دولة فقيرة لكن الامور متيسرة كون معيشة الحياة كانت بسيطة..نفس الدول الافريقية اليوم و بعض الدول الاسيوية..
يعني المهر 20 راس تيس 20 بقـرة..و بيسويله بيت من سعف النخيل و انتهت المشكـلة..و عياله بعد سنة في المزارع و الدنيا حلوة ببساطتها عندهم..لا يفكر في النت و لا سفر و لا الراتب..
.
.
عندنا الوضع مختلف..
الريال اذا اتزوج..يباله بيت – سيارة – السفر – التزامات بنكية – التزامات معيشة الحياة – ع الاقل في الشهر بيطلع بيتعشا ويا زوجته – الخ
بيفكر اذا عرست بعيش طول حياتي مديون و أمــوت مديون! ليش و شو المقابل زوجـة و عائلة؟
.
أنا اتكلم عن شخص راتبـه فلفترض 15 الف.
الاراضــي ما تتوزع للمواطنين الا بعـد فترة..او يطلع اسمه في الاسكان..و كل حسب واسطــته..
أرخص ارض في دبي و الشارقـة فوق المليونين..البناء أقل شي مليون..المجموع 3 ملايين؟
نقسم 3 ملايين 15000 الف..يباله 200 شهــر…نقسم 200 شهر ع 12 بيطلع لنا تقريبا 16 سنــة علشان يبني له بيت..
الحل الثاني ياخذ له قرض من البنك..اذا حصل الارض من الحكومة..بياخذ له قرض سكني بحدود المليون..فائدة البنك في السنة بحدود 80 الى 90 الـف..خلال عشر سنوات بيدفع تقريبا 1,900,000 الف.
يعني لابد البنت بعد تتحمل هل العشر سنيــن و ما تقارن نفسها بغيرها…اذا انتي كبنت لبستي ارقى ماركة في حفلة ما…ترى في نفس الحفلة ممكن في بنت بتلبس احلى و اغلى منج؟ يعني ما سويتي شــي؟ ترى مهما تكونين غنية في الاغنــى منج؟ مهما سويتي حفلة خيالية و صرفتي..في وحــده بتصرف أكثر منج يعني بعد ما سويتي شــي؟
.
و هالشــي من الواقع في ناس يتزوجون و مديونين فوق 500 الف بسبب البيت..اذا مب مليون…
و اذا هالشاب الاماراتي غامر مرة في التجارة و خســر كان الله في عـونه..
.
يعنــي التاجر ماله اي دخل في الموضـــوع!!!