غبيشة وفضيلة وبخيته وسعيدة

سعيدة .. يقولون سووا تشكيل وزاري يديد

غبيشة .. ويديه يا سعيده ينيتي يالله بالستر .. شوه وزارج ؟؟

سعيدة .. يعني بدلوا وزرا ء وحطوا غيرهم ..

فضيلة .. وانتي شو لج تتدخلين في اللي ما يعناج
.. بغيتوا زياده زادوكم علي لميه أميه .. وغيركم سبعين .

بخيته .. هذي سياسة دولة .. وشو يخصنا

سعيدة .. شقايل مايخصكم جيه الوزراء مب عيالكم يالخبايل .. شلوا ناس وحطوا ناس

غبيشة .. ربهم شلوا هذاك اللي رمستج عنه ..بنت بنتي تتريا من 4 سنين متخرجه
وتتريا دورها .. وكل ما تقابلهم يقولون لها مري علينا الشهر الياي ..
أشوفني بسير راس الخيمه بييب وياي تويسين رضع وغرشتين عسل سمر عندهم البرخضر ما شاء الله
هذي السنه .. وبسير له يمكن الله يهديه و يشوفلي صرفه ويا البنت ..

سعيدة .. لا هذاك تم مكانه .. ويقول لج .. ما يبا العربي يوطوط عنده ما يبغي الا الأجانب
‘كورتني وبورتني وش عرفنا بالرطينه نحن ‘

بخيته .. شو المعنى انه يبا اجانب .. جيه بلادنا بلاد اجانب والا كفره ؟؟

فضيلة .. يقول لج .. انه بيسوي تعليم غير نمونه ..

غبيشة .. هل كيف ؟؟
جان يبا يعلم عيالنا علي طريجة اللي يطرونهم في المراكز ما نباه وعطي عنه وياه من تعليم

فضيلة … يقولون انه يبا يخلي عيالنا انجريز ( انجليز ) يرطنون من خشومهم ..
يقول ان العربي ما فيه فايده وان حصص العربي لازم يلغيها

سعيده .. صبري علي انا ما افهم ها الرمسه .. شو يعني يلغيها

غبيشة .. يالخبله .. يعني يكنسلها يبغي انجريزي بس

بخيته .. وابوج يا بختوه .. عيل عز الله اعتوت لسنة عيالنا .. بروحهم يالله يرومون يقرون القرآن
ألحين مرة ما بيقربون صوبه ..
قول بنعرب المكسرين من عيال الديره!! تقوم تخرب العدل تبا تسويهم كلهم مكسرين !!!
جان ما اخلي المطوع اللي حذا بيتنا يمرغ صلوح واخوانه بعصا ويعلمهم عربي من اول بودي.

غبيشة .. اشوفه خلود مسود الويه .. يوم يشوفني يرمس انجريزي ويا اخته
هذي سواياه عيل ؟؟ ما عليه ان ما اتصلت بالبث المباشر اشتكي لهم

فضيلة .. ثره الا عند عيالج .. هذا عام وباد على الكل والكل جميع .

سعيده .. وليش ساكتين عنه ؟؟ شو نتريا ..؟؟ تبون نتريا لين
اييون عيالنا وكل واحد في ايده ربيعته ويتعلج لبان .. حشا وكلاّ

بخيته .. هيه صدق تذكرت .. إيه عيايز بقولكم تحملوا من البشاكير والدريوليه
عندكم لا تطرشونهم يشترون لكم غرض سيروا بروحكم ولا تشترون دنماركي
عااااااقب الله الدنماركيين … إلا الرسول محمد صلي الله عليه وسلم
صاحن العيايز… لا توصين حريص نحن من السنة اللي مضت محرمين أكلهم وشربهم ولبسهم … يعل نفاد ينفدهم

فضيلة .. امبونا نحن شو ناقصنا .. الزيده من البقرة … والجبن من الهوش لازم ناخذ الدنماركي لا بركة فيه .. كله موجود ولله الحمد ..
امبونه من يانا اكل برع ما يتنا السهالة زاد الكوليسترول وارتفع الشكري ( السكر )
انتن شوفن الأوليين كيف كانوا قوا ما شاء الله .. من هذاك السمن العربي ..

بخيته .. وانتي الصادقه يا فضيلة .. من يانا اكل برع ما يانا الخير .. يبوج يقولون يسبب السرطان
وييييييييييييييه فال الله من ها الفال . بسم الله يالله اتجيرنا ..

سعيدة .. سكتوا ما خبرتكم .. ولله الحمد والمنه .. اخيرا يوا يشفطون المطر من بيتي
العيايز .. عقب شو ووو

سعيدة .. عقب ما خاس خماس ..
يبوج عيزت من كثر ما ادق عليهم .. ترررررررررن ترررررررررررن تلفونات ما يشلون
اقول لهم غرقنا من المطر يقولون بنييكم ربع ساعه وبنكون عندكم وتمر الساعه ووراها الساعه
ونحن نتريا ..
شرواتكم تدفعون لنا بيزات على كل تانكر ماء تشفطونه من بيوتنا وتودونه مزارعكم جيه تتحرونا ماندري

بخيته .. غربلهم الله لو صاب المطر ببيت واحد من الكبارية جان يابوا له شفاطات من اليابان ..
يغيرحتنا عيايز وفقرا محد افتكر فينا .. ميتنا والا حيينا .. عاقبهم الله ..

سعيدة .. ويوم ادخلوا البيت .. قالوا وين المطر ما فيه ماي داخل البيت .. انتي بلاغج كاذب
وييييييييييييه حسبي الله عليه .. جاني مبلغه من اول ما طاح المطر ألحين ياي .. عقب ما اديت ما وراي ودوني على تناكر الشفط ..

فضيلة .. شراتج برخّه على راسه بعصا محناية وبقول له اقبض الباب .. لو فيهم خير ما فاحت بواليعهم
ولو فيهم خير ما فضحوهم في الجرايد والتلفزيون ..

غبيشة يقول لج .. حتى يران ( ايران ) ضحكت علينا وقالوا بيطرشون لنا لنشات نعبر بها

سعيدة .. هزركم بيعوضونا عن الخساير

بخيتة .. اغسلي ايديج واستخلفي الله .. العوض عند الله

سعيدة .. إنزين ما بيعطوني زل غير اللي غرقه المطر ؟؟

فضيلة .. عندهم يواني تبينهن ؟؟