سلام عليكم جميعا
فيه موقف حصل اليوم ،، ومن كثر غليان دمي قلت لازم أحط لكم هالموقف ..
لعل وعسى نشوف حل للمراهقين الحمقى (فئة من المراهقين)
خلصت دوامي ورجعت البيت أرتاح ،، وقبلما أفتح باب البيت ،، اتصل فيني (السيكيورتي) مال مؤسستنا ،،، وطلب مني أحظر قسم الطوارىء بالمستشفى ،،، قال لي أنه يبغيني أترجم لهم بالعربي (لأن السيكيورتي مايعرف عربي وايد)
المهم رحت فورا للمستشفى قسم الطوارىء وشفت السيكيورتي يتكلم مع شوية دكاتره وممرضين ،،، قلت له شو السالفه وقال:
لما كان السيكيورتي راجع بيته مشي ، هو وصديقة الكلينر cleaner واحد من منظفيين مؤسستنا ،،، فجأة سيارة يت مسرعة صوبهم ولفت صوبهم وواحد كان فاتح دريشة عدال السايق وفجأة طلع يده ودز الكلينر وطيحاه صوب الحصى ..
يعني المراهق الغبي تم يضحك ويصارخ وطلع يده من الدريشة ودز الفرّاش بقوة ..
وبعدها هربوا
والفرّاش طاح صوب الحصى وراسه انشق من ثلاث جهات ومايروم يتكلم والدم صبغ وجهه وثيابه ..
وقبلما توصل الاسعاف ،،، ياك واحد من العرب فيه كل الخير وشلوه المستشفى ..
وهو حاليا بالطوارىء يسوون له خياطه أظن …
وهذه ثالث مرة حاصلة مع سيكيورتي مختلفيين وبأوقات ومواتر مختلفه ..
يعني هذا المنظف النيبالي مغترب عن أهله وراتبه 800 درهم فقط
وهذا جزاته اييوون هالمراهقين الصايعين الضايعيين ويسوون هالحركات الشينه ..
ماخلوني أدخل الغرفة أشوف هالفرّاش ،،،، وأما السيكيورتي قال لي وهو يبكي : نحن شو سووينا لهم عشان يضربونا هالشكل ؟؟؟
وأنا سكتت وقلبي احترق وسألته شكل الموتر ،، وقال لي شوية مواصفات واسم السيارة واللون ،،
وهذه رجعتي من الطوارىء
بشوف شو اللي بسوويه باجر بإذن الله ..
حسبي الله ونعم الوكيل فيهم والله لايبارك بهالأشكال من المراهقين الصايعيين ..
سامحوني ماكتبت التفاصيل ..
وهل نلوم أهلهم ؟؟؟
القلم الحر
لا حول ولا قوة الا بالله..
صراحة انصدمت ان عندنا شباب يسون فوضى بهذي الطريقة عشان يتسلون… …شو هالتخلف..
وقت فراغ وقلة تربية..لا شغلة ولا مسؤولية والمصروف بالجيب وسيارة (بالذات قوم بالفتك )…شو تتوقعون يطلعون؟ عباقرة زمانهم..
اذا اهاليم هادينهم في الشوارع يتعلمون منها ..في عمرهم ما بيطلعون نافعين لشي…لا لنفسهم ولا لاهاليهم ولا للدولة..
اتمنى يزخونهم ويعاقبونهم عشان يتأدبون…ويكونون عبرة لغيرهم
الله يهديهم..
صدقت أخوي صاحب محفظة ،، لكن هذول المراهقيين وين الإيمان والرحمة اللي بقلبهم ؟؟؟ والله حتى العدو فيه رحمة ،،، أما هذول انعدمت الرحمه منهم
ياليتك عندنا كنت أنا وأنت لحقناهم وكسرنا لهم راسهم مثلما كسروا راس هالفقير الفرّاش
وأنا سبق وخبرتك أن علاقتي مع السيكيورتي والمنظفيين علاقة قوية وأساعدهم وأوقف معاهم لأنهم مساكين بهالغربة ..
الله يقومه بالسلامة
وباجر الصبح بزوره ويارب يتحسن … تراني أعلمه اللغة العربية يوميا وفعلا قلبي وجعني من المنظر اللي شفته
__________________
من أمن العقوبة أساء الأدب
الله يعين العمال على ها الاشكال من المراهقين والله اليوم انا رايح المصفح
شفت سيارات فورويل مزوده ومراهقين كل واحد يسوق تقول سكران
والله يفحطون ويلاااات بالسيارات تقول شارع ابوهم والله هندي من العمال كان بيروح فيها
ما عنده شغله ولا مشغله لو قدرت تيييب الرقم السياره او اخر رقمين من السياره مواصفاتها يقدرون
يبون صاحبها وان شاءالله ينصادوون ويحطون صورهم بالجرايد عشان ينفضحووون يتحرون انه الحركه تضحك الله المستعان..
لاحول ولاقوة الا بالله
قواك الله .. حسيت بك مرهق
عزيزي هذي فئة مالها اي هدف في حياتها والسبب: تربية الاهل وعدم اهتمامهم ,, الاصدقاء ورفقة السوء,,, وقت الفراغ.
هالاسباب الثلاثه حطهم في خلاط وامكسهم عدل وصبهم في مخ مراهق وشوفه شو بيسوي فالدنيا .
الله المستعان,