ان شالله الموضوع يكون خفيف على قلوبكم واخليكم ويا الضرابه

الشيبــــــــــــــــــــــه:
قلبي شباب ولازم اني اعرّس .. مابا العيوز اللي اتوسّد على الباب
الخير وايد وانا ماني مفلّس .. عندي فلوسٍ تدعم البنك في الحساب

العـــــــــــــــــــــيوز:
ما باقي غير خشمك وهالضرس .. تبغي تعرس وانت غادي شالغراب
قابل صلاتك الله يشفيك م المس .. والاّ ترى باطب ويهك بالتراب

الشيبـــــــــــــــــــه:
إنتي عيوز وأكلك الروب والخس .. اما انا ماكل سوى تكه و كباب
ما فيني سكر غير ضغطي نازل بس .. دام الهوى فيني ترى كل شي طاب

العيــــــــــــــــــوز:
لا بارك الله فيك يا الشيبه يا النحس .. ما تيبك الرمسه ولا ايبك اعتاب
قصرلي صوتك مابا اسمع ولا حس .. عطني طلاقي وانقلع واقبض الباب

الشيبــــــــــــــــه:
دومك نحيسه وذا لسانك يبا قص .. ربي ترى حلل لي اربع بالكتاب
هذا خميس الاعمى يا كم عرس؟ .. مرتاح في الدنيا بل اهم واعصاب

العيــــــــــــــــوز:
بطران وراسك كالصخر يابس وعص .. مالوم طبعك يوم ربعك هالكلاب
غادي شرا الاريل.. ودومك اتحيّس .. استح على ويهك.. أصلع ولعاب

الشيبـــــــــــــــــه:
فكيني من ويهك ترى مالي أي نفس .. زهقان من شوفك وابغي لي أحباب
هذا طلاقك طالقه اربع وخمس .. شلّي طلاقك من ضميري بلا احساب

العيـــــــــــــــــوز:
مشكور يالشيبه ومن دون أي دس! .. عندي حبيب ما ابتعد لحظه وغاب
يشريك ويبيعك تراه ابثمن بخس .. ما تسوى ظفره .. حلوٍ اسمر وجذاب

الشيبــــــــــــــــه:
يالله قبل لا موت منك واغتص .. طلعتي لي قرنٍ وراسي بعد شاب
يا شينه البرقع ترى قدرك اختس .. عيوز ولك في الدنيا خلان واحباب

العيــــــــــــــــوز:
مثلك تراني وهذا لك في العمر درس .. لاني أميز بين شيبه وشباب
والا نسيت اني على الموضه ألبس .. ما علموك اني بلا شيله وحجاب

6 thoughts on “شوفو ا الشيبة والعيوز على اخر العمر

  1. العيــــــــــــــــوز:
    مثلك تراني وهذا لك في العمر درس .. لاني أميز بين شيبه وشباب

    والا نسيت اني على الموضه ألبس .. ما علموك اني بلا شيله وحجاب

    خييييييييييبة هذي قووووووويــة

    مشكورة الغالية على هذا الموضوع الفكاهي

  2. لو تشوفني شيبه واغرس

    وامشي بعكازين وارتي
    والله والله ما تعرس ما دام راسي باجي وحي

    الله يرحم بن طناف

    قصيده حلوه يا سما الظبي

Comments are closed.