سؤال للمرأة الاماراتية _____ هل انتي راضيه عن التغيرات التي حصلت في السنتين الاخيرتين

47 thoughts on “سؤال للمرأة الاماراتية _____ هل انتي راضيه عن التغيرات التي حصلت في السنتين الاخيرتين”

1. غريبة الردود…

   وأسمحو لي…رمستيه بالصميم..ما أحب أجامل….!!!

   خلونا واقعيين…وصريحين..وبلا هاي المثاليات..(أخص فئة معينة)…

   أنا متأكدة 1000% اللي يالسين يدافعون ويمنعون…. ومش راضين عن عمل المرأة…هم أول ناس زوجاتهم عاملات..

   ووايد متزوجات كانن معانا بالدوام…وأزواجهن ذوي مناصب..ورواتبهم عالية…ضعف راتب زوجاتهم..ويحاولن أنهن يستقيلن للتفرغ للبيت والعيال…..

   بس أزواجهم هب راضين…

   وأذا صمموا على الأستقالة ..وواجهو الزوج بالأمر الواقع..

   من فير الله الزوج خذا السي في..وما خلى مكان ما يقدم فيه..

   والله الكلام من الواقع..

   مثال…
   (شرات وحده عندنا بالدوام السابق طبعا..و24 تتغنى بريلها..انه ملتزم وما يخليها تشتغل بمكان مختلط…وفجأة الظاهر الزوج مقدم لها بالبترول..وظهر أسمها وقبلوها…
   .ولازم تسير للجزر بالهيلوكبتر..والمكان طبعا مختلط….صخت..ووافقت..ليش..الأمتيازات طبعا أحسن…
   عيل وين المثالية والرمسة..يوم نشوف المادة نصخ….؟؟؟

   بس ما أعمم..

   والسموحة،،،

2. هذا رأي وحدة من الخوات المستقيلات,,,

   أنا استقلت من سنة..مب عشان مب مرتاحة في الدوام.. أو راتبي ضعبف.. بالعكس الراتب كان ممتاز.. لكن سبحان الله كرهت الدوام.. وكرهت الطلعة من البيت.. وسواقة السيارة..وكنت أحس بالذنب عشان عيالي..

   لكن البيت.. جنـــــــــة .. صدق.. وما بتحس بها الشي إلا إللي مجربة الدوام ومتاعبه.. خصوصا الوحدة المتزوجة واللي عندها عيال.. ولا تقولولي نوفق بين الاثنين.. لان العيال دوم الضحية مساكين.. والريل طبعا”..
   ارتحت من الدوام الرسمي والربطة من الصبح لين الظهر.. من الاختلاط باللي يسوى واللي ما يسوى.. شو جابرني؟
   من السواقة في الشموس والزحمة اللي تحرق الاعصاب.. والحرمة مب ناقصة حرق أعصاب..
   مسئولياتها كفاية.. بعد تزيد على عمرها مسؤؤلية دوام..؟! والله خواتي ان راتب الحرمة مافي بركة.. والسعادة اللي ننشدها من ورا الشغل والراتب هي سعادة زائفة.. إلا حرة وغصة.. نص الشهر أدور وين راح الراتب ما عرف..!!
   والله ان راتب ريلي صار يكفيا ويزيد.. حلت فيه البركة.. وقبل راتبين وماكنا ملحقين..
   ودوم أكرر ولا زلت.. يوم اشتغلت ما زاد علي شي.. ويوم استقلت ما قصر علي شي.. الحمدلله..

   والحرية المزعومة هي حرية كاذبة.. بل هي سجن وظلم للمرأة.. الحرمة ملكة في بيتها.. قال الله تعالى : ” وقرن في بيوتكن “
   صدقوني.. ترا الدنيا ما تسوى.. الواحد يركض عشانها.. ويهلك عمره.. الرزق على الله .. وعلى الريال..والواحد مايعرف الله شو كاتبله.. واللي ربي قاسملي اياه بخذه.. “علمت ان رزقي لن يأخذه غيري.. فاطمأن قلبي “..

   سامحوني خواتي ع الإطالة لكن حبيت اللي تعبانة تجرب السعادة اللي أنا عايشتنها..أما عن وقتي كيف أقضيه.. أقول اللي عندها عيال.. يشغلون وقتها 24 ساعة.. مع اني عندي اثنين بس.. لكن مالين علي حياتي وروحي.. وطلعات مع ريلي اللي صار يحبنى ويقدرني أكثر عن قبل (سبحان الله).. وطلعات مرات مع الصديقات وزيارات صباحية.. نتريق برا.. نسير الاسواق نفصل شرات بعض.. أطبخ.. أقرا.. القراية شي رائع.. اللي مب مجربة تجرب.. بتدخل عوالم جديدة.. أحفظ قرآن.. أصلي مثل الناس.. أدخل دورات مثل سباحة..ميك اب.. محاضرات.. نوادي رياضية..أدخل النت.. اتعلم مهارات جديدة في الحياة.. في البيت ولو بسيطة مثل تنظيف البيت..أو طبخة جديدة..مهارات يدوية.. تراها تجدد النفسية .. وتعزز الثقة في النفس..

   ولا تتحرون اني كرهت الدوام لاني هيزة مثلا.. بالعكس انش من الصبح الساعة 6 أو 7.. لان نشة الصبح حلوة وتزيد النشاط والفرح.. وأنام بكير بعد.. بس مرات اسهر مع زوجي نطالع فيلم في التلفزيون..نتعشى..نولع شموع..موسيقى هادية.. طبعا أحلى الأوقات اللي أقضيها ويا عيالي وزوجي.. إللي تغيرت نفسياتهم.. مثل ما انا تغيرت نفسيتي..

   وتمنياتي للجميع بالراحة والسعادة..

   واتمنى من الجميع انهم يعيدون حساباتهم..

3. اذا اتفقت الاراء ان المرأة غير مرتاحة

   بهذة التغيرات

4. عمل المراه الاساسي هو البيت وتربية الابنا ء وهذا
   امر لا يستطيع احد ان يخالفه ولكن لا يعني هذا ان
   نحرم المراه من العمل ضمن نطاقات ترضيها ذاتيا وترضي اهلها ،،ولا من تهميش دورها اذا هي استطاعت ان توازن
   بين العمل وبينن بيتها ..
   والزوج هو من يملك القرار في مكان عمل زوجته
   وقد يساعدها في اختيار المكان الانسب لها وله
   فهو له الحق في ذلك بالعكس المرأه يسعدها ان زوجها يشاركها في معر فة تفاصيل عملها ويسعدها اكثر اذا
   رأت اهتمام وغيره مستحبه وتوجيه دائم لها فهذا يعطيها دافع لتحقيق نتائج ناجحه
   ومؤكد سينعكس هذا الامر في بذل مجهود أكبر لنجاح عائلي ..

   خلاصة مااردت قوله ان ولي الامر (زوج أو اب) هم المسؤولين مسؤوليه كامله في اختيار جهة عمل مناسبه
   لاتمنع من الحد لطموح بناتهم وزوجاتهم اذا هن قادرات على الالتزام بعمل موازنه بين البيت والعمل خارجه

5. مثلا أول سنه اشتغلنا فيها كنت ننشف ونعرق ونستحي يوم انشوف رياييل والا انرمسهم بعدين صار الامر عادي بس وصلنا الى قلة ادب

   أقصد ما وصلنا الى قلة أدب

Comments are closed.