قام الواحد يكره يسوي خير في الناس يتعودون ويلصقون فيه لين ما الواحد يطفر من عمره
اسمعوا سالفتي ..
من اخلص الدوام أركب السيارة بروح البيت أشوف وحدة من الزميلات تتمشى ادور تكسي
غمضتني قلت مب حلوة أطوف جدامها وما أشلها وركبتها وصلتها مرة ومرتين وثلاث
الحرمة اتعودت شغلتني درويل عندها مع ان دربها غير عن دربي حتى قمت اتأخر مال نص ساعة عن البيت
مصختها… قبل ما يخلص الدوام أشوفها مرتزة في مكتبي واتقولي يلا حبيتي هوايا اتأخرنا ما خلصتي شغل
وانا عاد ويهي بويه المنتدى أقولها شوي مشغولة ومضغوطة وتعبانة من الشغل اللي ما يخلص
اترد عليه بكل برود ما عليه حبيتي بكره راح تكملينه الحين قومي انروح البيت نرتاح
وانا في خاطري بموت من الغصة قلت شو هالناس شو هالبلوة اللي الله بلاني فيها
والله قبل ما يخلص الدوام بربع ساعة تمسكني حالة هستيرية اتوتر واتصبب عرق يا انخش يا اطلع من وقت سوتلي فلم رعب الله يسامحها
اتفقت انا وزميلتي في المكتب ان قبل لا يخلص الدوام اندس في مكان واذا يت تسال عني اتقول لها ان عندي شغل وبطول والا في اجتماع حشى قمت العب صوير وياها
الصراحة انا ما عندي مانع أوصلها كل يوم بس لو كانت في دربي لكن هي دربها غير عن دربي
والواحد ما يصدق متى يخلص الدوام يرد البيت يرتاح
دخليكم فكوني منها قولولي شو اسوي وياها 
لصبر اخر خلاص خلاص خلاص
عافك الخاطر
انته بطريق وانا بطريق……..
ومثل اخوانى المصريين (لو حبيبك عسل ماتلحشووووش كله)
انا أوصل بنت يرانا كل يوم في السيرة وفي الردة
والحمدلله لا عطلتني ولا تعبتني لأنها في دربي
ويوم اتييب لي هدايا وأغراض اهزبها وما أرضى أخذ عنها أقوللها نحن خوات وما مبينا شي
لكن هالانسانة بيتها بعيد والوالدة تيلس اتحاتيتني كل حين تتصل ما تباني اتأخر
حتى مرة طرشونا دورة عقب الدوام ولصقت فيني طول الدورة
بس تعب كل يوم
وفيه ناس من أسلوبهم وتعاملهم تتمنى تعطيهم عيونك
وفيه ناس من ثجل دمهم وغلاستهم وخاصة هالانسانة تحسسني اني اشتغل عندها واني مجبورة اوصلها كل يوم
الصراحة أنا كانت عندي هالمشكلة أيام الكلية لاني كنت أوصل وحدة و كنت أضايق وساعات أتنرفز مع انه على نفس الدرب بس بعدين صراحة س هالشي يكسبج وايد أجر لانه مرة سمعت في الاذاعة انه الله يكسبج أجر على الناس اللي اتوصلينهم في سيارتج…بس اذا تبين الصراحة احنا شعب نستحي انقول لا لكن في وضعج هذا أنا أقول كلمة تستحين منها بديها واذا هي روحها ما استحت و قامت اتي مكتبج قبل نهاية الدوام قوليليها مثلا انه من الاسبوع الياي اتشوف حد ثاني ايوصلها لانه انتي مب على دربها وتبين اتردين البيت أسرع لانه تبين اتريحين و أهلج مب عايبنهم الوضع انج كل يوم اتردين متأخرة. و خبرينا شو ايصير وياج بس صراحة أنا أقول لا تستحين منها اذا انتي مب رايمه على توصيلها كل يوم لانه شكلها خذت عليج بزيادة.
أنا صح كنت أوصل ربيعتي أيام الكلية بس كانت ساعات تصر تدفع البترول و ساعات تنزل المحطة تاخذلي عصير أو سندويش يعني حليلها كانت روحها تفتشل و اتحاول اتسوي أي شي، بس هاي خذت وايد عليج .
الله يعينج
تكسبين اجر