بسم الله الرحمن الرحيم
قبل كم من يوم شفت برنامج يتكلم عن السيارات الأمريكية وغرقها بعد إعصار كاترينا
500.000 الف سيارة غرقانه في امريكا وتم اعاده صيانتها وبيعها من اول ويديد كسيارة جديده او مستعمله بقيمه مغريه ورخيصه للغاية بدون إعلام المشترين انها من السيارات الغرقانه .
بعد تحليل وفحص بعض السيارات الغرقانه اكتشفوا بأنها خطر على حياة السائق والركاب لأنها تفتقر إلى مقومات السلامة الضرورية وأيضا تهدد سلامة الآخرين وعمرها الإفتراضي اقل بكثير عن السيارات الأخرى
وفي عدة قضايا مطروحه الآن على ساحات المحاكم الأمريكية لأمريكان اشتروا سيارات من الأصل كانت غرقانه وما اكتشفوا هالشي الا عقب فتره وطالبوا بفلوسهم بس الشركات رفضت إعادة السيارة فلجؤا للقضاء
للعلم يا جماعه البرنامج أمريكي يعني مب عربي وكان معروض في قناة ABC NEWS
اللهم بلغت
اللهم فأشهد
اخوكم
ابو شوق
السيارات الوارد من أمريكا تتسم بنظافتها ومحافظه الامريكان على المواتر ومداومه صيانتها
وهذه حقيقه جربها الكثير من الاخوان الذين قاموا بتوريد سياراتهم من أمريكا
الناس نسواالحلال وما قاموا يفتكرون حتى بهالموضوع
الهدف الربح
الزرق الحلال حتى وهو حلال يوم الحساب في حلاله حساب وفي حرامه عقاب
مشكورين على الردود والتواصل …
صدقت والله يا ” بن دبي “
ومرات يوم اتسير المعرض تبى تبيع سيارتك يقولك فيها صبغ الباب أو المدجار
سيارتك وانت ادرابها ييلس يتفلسف عليك والله اقوللهم ليكون انت سرقت السيارة ودعمت فيها وأنا ما ادري ! !
كيف سيارتي واتقول صبغ في المدجار أو البونيت ع كيفك هو …
ويوم تشتري من عنده قالك والله وكالة والله والله … ويوم اتشوف الصبغه امبينه فسيارته اتقوله شوف يقولك ما ادري ما ادري يمكن مش مصبوغ أو مافيها معجون …
وين بيسيرون من ايد ربهم وين ؟
مشكووووووووووووووور اخوووووووي ع الموووووضووووع
وحذااااااااري من الوارد بشكل عاااااااام ادفه 10000 زياااااادة وانت مرتااااح البال لا كراج ولا كهربائي ولا شياتتتته وحط راااااسك ونام بدال عوووار الراس
اقتراحي ان اخونا سعود الله يذكره بالخير انه يشوف شو اكثر الطلبات على السيارات اي مواصفات واي موديل ، ويفتحله معرض في الامارات ويقدر في كل إمارة مثلا ابوظبي ودبي…. ويعرض فيه السيارات والشراي بشوفه عينه عشان لحد ينظلم ، لانك تطلب السيارة من غير ما اتشوفها ويوم توصل ما تعيبك وكلام وسالفه طويله إلخ …
سالفه من السوالف : واحد من الربع سار معرض فيدبي ما يحتاي اذكر المكان ، وخذله لكزس والغبي ! دفع الفلوس وقالهم انا بفحص السيارة في المرور/ ادنوك واذا طلعت ان السيارة سليمة ترى حلالكم عندكم السيارة عندي واذا طلعت السيارة فيها شي لا سمح الله برجعلكم وقالوله تم . ما شاء الله عالسيارة تلق وتلمع وحرام انك اتقول فيها شي ، لما فحصها طلع فيها # الشاصي # واتصدقون من أول السنة يعني تقريباً 5 شهور ولين الحين بعده عالسالفه والشكوى والمحاكم والمراجعاات وجلسات ومواعيد وبطييخ ..
– هذا كله طبعاً غلطته هو لأنه ما فحصها في نفس الوقت عندكم .
وثاني شي انه اصحاب المعرض عطوه كلمة وضمنوله بالكلام وردو في كلمتهم . !!!
وسالفه من السوالف : يالسوالف الي ما يخلصن. نفس الشي مرة سرت ويه ربيعي معرض من معارض العين اسمه ( مب حلوه اطري اسم المعرض ) ورحب فينا راعي المعرض وقاله آمر ؟؟
والله يا خوي ادور على لكزس مديل 98 99 2000 . قرب قرب وعطانا كم من صبغه وشغللنا ذاك اللاب توب وتشوفنا السيايير والحبيب صاحبنا اختارله سيارة / لكزز 98 بيضه + شاشه وشاف الدعمه الي فيها في الأمام يعني بشوفه العين و 9 صور للسيارة من كل النواحي ان فيها الدعامية الأمامية من الوسط ظربه يعني لازم تتبدل وليت واحد من وشبك والبونيت ظربه بسيطه يعني سمكره وصبغ ، واتفق مع صاحب المعرض بأنه يبى السيارة قاله خلاص تم ، اتفقو الحبايب وبشوفه عيني وسمعه اذني والله الشاهد ان صاحب المعرض قال لربيعي ( يوم توصل السيارة وما عيبتك بردلك فلوسك ماشي أي مشكله ) وصاحبنا قال بس هني الدنيا هذا هو المعرض ولا بلاش ، وعطاه مقدم 10 آلاف وتريه 45 يوم تقريباً ما اذكر فالمهم وصلت السيارة وكمل الفلوس صاحبنا وصلح الدعمات الخفيفه في الكراج ويوم ياي يبى يسجلها في المرور ، فحصوها وطلع فيها راس الشاصي من الأمام ؟ ! ؟ ! !
ويوم رد لصاحب المعرض قاله مشكلتك ، ذكره صاحبنا بالكلام الي قاله بأن يوم توصل السيارة وما عيبتك … قال لاء أنا ما قلت !!!!!!!!!!
وطاحت السيارة في جــبـــد صاحبنا .
الغلطه – ان صاحبنا ما تكاتب وياه ضمان الشاصي بفحص ادنوك حين وصول السيارة .
– اعتمد عليه وخذ كلامة وثاني شي ان صاحب المعرض رد في كلمته .
يعني صاحبنا ماله اي حق ابصراحه لو اشتكى ؟ القانون لا يحمل المغفلين ! !
هذا كله طبعاً تحذير للي ما يعرف المواضيع البسيطه هاي وين توصل
ويتحذر من الأخطاء
وما قصدي شي الا الخير
كتبتلكم قصة حياتي خخخخخخخخخخخ
والسموحة ..
اخوي اذكر اسم المعرض.. هالاشكال لازم تشهرهم علشان يتحذرون الناس منهم
شي من المعارض والله يخافون ربهم.. ما يأكلون اهلهم مال حرام
وشي منهم عفانا الله.. تبيع له سيارتك وتقول له مدعومه
ويوم ترجعله عقب فتره وللا اتطرش له حد يحلف براس عياله ان السياره مب مدعومه
واستخدام شيبه…
من فتره بعنا سياره على معرض في العوير.. اسمه كارس دوت كوم
السياره كانت فيها ضربه في القبه والبونيت(انفتح عالخط بروحه)
وماشيه 200 الف…
والله العظيم سرنا عقب فتره نشوفها.. قال اللي يشتغل انها مب مدعومه
بس مصبوغ البونيت بسبة شحفه صغيره.. وما ياب طاري القبه
والقهر يوم شغلها منزل الكيلو.. ماشيه 62 الف!!