تحذير عن منتج JIAOLI + تجربة سيئة مع ewaseet .. حسبي الله ونعم الوكيل

بسم الله الرحمن الرحيم

السلام عليكم ورحمة الله وبركاته

اشحالكم إخواني وأخواتي

أحب أبدأ من البداية .. وهي بداية النهاية في نفس الوقت نهاية البداية

بحاول أختصر كثر ما أقدر على أساس ما أمملكم

تبدأ قصتي يوم شفت إعلان عن منتج JIAOLI الكريم الفلبيني اللي فيه كريم أبيض للنهار وكريم زعفراني لليل

وشفت أسعار متفاوته .. شفت اللي يبيعه ب 60 درهم .. وشفت اللي يبيعه 35 درهم

طبعا إخوكم كنجوس قال بياخذ اللي ب 35 درهم

وفعلا تواصلت مع المدعو ewaseet وسألته قال هذا الكريم زين مع عدة كريمات ثانية وملح الأسبا

واتفقنا على السعر وسعره الصراخة كان ممتاز والحق ينقال

وطرشت له إيميل وطلبت منه

بعدها بفترة رد علي وقال أنا من شركة توزيع .. هههههه حركات .. قال إنت عندك طلبية من الوسيط

قلت هيه نعم انا طالب وينك إنت

قال خلاص باجر عندك

اليوم الثاني إتصلت شو السالفة وينك

أثاري يقول لأ أنا ewaseet .. قلت له عيل أمس انت تقول إنك الشركة اللي توصل واليوم تحولت للمالك نفسه

مب مشكلة

أبا المنتجات اللي قلت عنها

قال خلاص الشباب بيوصلون لك

قلت أوكي

بعدها بيوم أو يومين ” عنبو شو بيوصلون ” اتصل بي واحد يقول لي نحن الشركة اللي نوصل ونحن ياييين عندك

وينكم زين يا جماعة

والله نحن بالدرب وحاليا بالشارجة

إتصلت ب ewaseet وينهم ربعك .. قال إنتظر بتصل بهم وبرد عليك

مرت دقيقتين إتصل بي يقول لي الجماعة في أم القيوين

شو السالفة

والاسلام يقول دور لأخوك المسلم 70 عذر

قلت يمكن سبحان الله مخلوق فضائي طايف ووصلهم بالدرب عن طريق الاشعة السينيه

ما علينا .. إنتظرت وإنتظرت .. وأنا لي مشاغل .. يعني بعد الساعة 9 انشغل

والجماعة مرة نحن في دبي .. مرة عيمان .. مرة راس الخيمة ..

الريال اتصلت به كذا مرة

قال خلاص أنا عندي شغلة صوبكم وبتصل بك وبييب لك الشغل

قت له أوكي

وفعلا على الموعد سلمني واستلم

————————————————————————

المرة الثانية طلبت الكريم وكلمت الريال وعرضت علي منتجات ثانية

طلبت وهالمرة عفدت عليه لي عقر داره

إتصلت به قلت له يا فلان أنا ألحين في المنطقة الفلانية وتلاقينا وتم البيع

————————————————————————

المرة الثالثة

أقصد طار حسن ewaseet

كلمته وقلت له أنا بعطيك مبلغ معين مقابل عدد من الكريمات

واتفقنا انا وهو على المبلغ وكل شي

وسكرت عنه التليفون ورمست ربيعي قلت له يعطي ewaseet البيزات وياخذ المنتجات المطلوبة

تعرفون قبل لا يكون بالاسلام نحن الريال ينمسك بكلام .. ما يثني رمسته ..

ثاني شي .. انحل المجلس بيني وبين ewaseet .. اتفقنا وخلاص كل واحد سكر عن الثاني وكنا راضين

المهم ثاني يوم أتصل فيه على اساس أحدد معاه موقع يقابل الريال ما يرد

والله إتصلت به وااااااااااااااااايد

عنبو لو عندي ربيعة و زعلانة مني ما بتصلبها جذه

وبعد قلت يمكن الريال له أعذار يمكن مشغول الله لا قال استوا به شي

ما يرد

ترن ترن ترن ترن

رن التليفون لي ما قال بس

ربيعي يتصل بي يقول لي يا بو هزاع وين ربيعك .. أنا من ساعة أتريا

قلت له خلاص توكل انت وربيعي تم ينازعني وايد

المهم بعدها بساعة ساعتين أتصل بالريال ما يرد

يوميا أتصل به وما شي فايدة

قلت ما شي غير أتصل به من رقم غريب

وفعلا كنت أتصل به ما يرد .. انتظرت خمس دقايق واتصلت من تليفون ربيعي

رد علي .. قلت ها بو علي .. وين ما ترد علينا

والله تلعثم بالرمسة وكأن حد جاب عليه ماي بارد

قال لي بو هزاع السعر اللي عطيتك إياه ما يناسبني

قلت شو اللي يناسبك قال يناسبني جذه وجذه .. قلت فالك طيب

مع إنه أخل بالاتفاق وهذا الشي بيني وبينه يوم القيامة الله بياخذ حقي منه

المهم يعني تنازلت عن وايد اشيا عشان خاطره وقلت هذا اخو

ويمكن أول ما حسب عدل وألحين حاسب عدل

مع إنه حتى لو هذا الشي بعد ما يستوي

قال خلاص انا مشغول وبرجع بتصل بك

ورجعت كلمت ربيعي

قلت له لا ترجع .. ربيعي يوميا ساير راد من راس الخيمة لي بوظبي

المهم رجعت أتصل ب ewaseet ما يرد

اتصلت به وايد

آخر شي طرشت له مسج

قلت له تبا تبيع أو لأ ولا تسوي لي شرات اليهال

رد علي بمسج أونه اسمح لي بس الكمية نفذت عني

رجعت أتصل به بنفس اللحظة ما رد علي

على العموم أنا بعدني ما خلصت شغلي معاه

بس حبيت أنبهكم

وخذوا حذركم

——————————————-

وغير ewaseet

خذوا حذركم من هالمنتج JIAOLI

أنا استخدمته وفادني

بس قريت ان له آثار جانبية وتشيب الواحد وتسبب تجاعيد مع الوقت

والحمدلله يا الوسيط ما رديت علي

اللي استغربت منه إن حتى اللي يبيعون هالمنتج ما يستخدمونه

هذا رابط التحذير من منتدى أجنبي إن له آثار جانبية سيئة وخطيرة

SkinCareRx Forums and Bulletin Boards :: Melasma :: Urgent warning about JiaoLi

وهذا رابط تحدير من منتدى عربي

تحذير من كريم جياولي JIAOLI –

والسموحة طولت عليكم