السلام عليكم ورحمة من الله وبركاته ..
شحالكم يا أعضاء منتدانا ؟؟ ما عندي وقت بسرعه !! هـي خلااااااص .. أنا الحين عندي نص مليون ما عندي وقت أحدر منتدى وغيره .. ورايه مشاريع وبزنس !!
طبعاً .. مثل ما كلكم قريتوا من العنوان .. ربحت نص مليون .. ولو سمحتوا أنا إنسان بخيل وما أسلف حد وأصلن قبل لا تفكرون في كل هالاشيا اسمعوني شوي … .
قبل لا تسألوني عن النص مليون .. خلوني أخبركم عن القصة ..
الخميس اللي طاف .. راد مشي من صلاة العشا .. والجو حر .. وموت !!
رديت البيت .. وأول ما دشيت الحجرة .. يزاه الله خير اللي اخترع المكيف .. الحجره بارده وأنا اتنافض من البرررررررررررررررد ..
ياني رقاد هااااااااااااوو >>> أتثاوب ..
وحطيت راسي عالمخدة .. وقبل لا أرقد .. تميت أفكر في حالي وحياتي ..
أفكر في الديون … وأفكر في عيالي منو بيطعمهم .. وأفكر كيف بقدر ألبي متطلبات الحياة .. وانغلقت عليه الأبواب >>> مع اني مب معرس والحمدلله ما عليه ديون ..وما عندي عيال بس يعني يالس ادرب حق الايام اليايه ..
المهم .. تميت احاتي وافكر وما قدرت أرقد لين الفير .. عينت من الله خير .. ورقدت عقب صلاة الفير >>>>>>>>>>اي شخص يربح جايزة ولا نص مليون يقول نفس هالكلام .. اتسكرت عليه الابواب واسودت الدنيا في عينه وما رام يرقد وآخرتها رقد عقب الفير !!
ما علينا .. المهم .. صليت الفير و وطيت راسي ورقدت ..
توني راقد ما وحالي حتى أناخر أو أتجلب !! إلا ياني ذاك الريال الشيبة في الحلم .. وكان لابس كندورة بيضا وقحفية … وشافني بنظرات حزن وقالي :
آآه يا ابني يا العميمي .. الدنيا دي كلها هموم وأحزان ومشاكل !! ربنا ينصرك يا سعات الباشا ونشوفك مدير أد الدنيا بجاه النبي محمد صلى الله عليه وسلم .. ممكن دقيقتين من وأتك يا سعات الباشا ؟
قلتله اتفضل !! بس دخيلك لا تطول الحلم توه بادي وانا الصراحة أبا ارقد ورايه صلاة جمعة !!
رد علي : لا لا همَا كلمتين حؤولهم وحمشي .. النهارده يا سعات الباشا حتسمع خبر حيحل جميع مشاكلك !! آآه أومال إيه !! انته فاكر انا جايلك بالمنام لحتى أشوفك واسلم عليك !! هوا أنا ما عنديش حاجه يعني أجيلك كده !!
وقبل لا يكمل الشيبة كلامه .. سمعت صوت “طرنن” .. طبعاً كان صوت مسنجر بلاك بيري الريال الشيبة ..
قالي صاحبنا الشيبة : معلش يا سعات الباشا أصل المدام بتكلمني على البي بي وعاوزه حاجات من السوء !! يالله سلام !!
فجأة !! نشيت من الرقاد !! على صوت التلفون يرن … وانا مبطل عين ومبند عين ومشفر .. ومب مستوعب شي ..
لا إله إلا الله .. منو ها اللي مطرشلي مسج عالصبح !! هذا محد غير “فـلان” الله يهديه ..
كل صباح جمعة يطرشلي هالمسج “جاك الموت يا تارك الصلاة” .. مادري شو هدفه من هالمسج مع أني أصلي ولله الحمد ..

المهم ما قريت المسج ماكان لي بارض .. وأسرع طريقة لجعل التلفون صامت .. هو أن تمسكه بيد واحده وأنت مغمض العينين وترميه على الأرض بـ كل ما أوتيت من قوة !! وجربت الطريقة والحمدلله نجحت
عاد الهدوء للغرفة .. ورديت وطيت راسي وبندت عيوني .. وكملت رقادي .. وما وحالي أحلم مرة ثانية !! إلا رد هاك الشيبة وظهرلي فالحلم مرة ثانية !!

لا إله إلا الله .. صباح خير ولا صباحك يا الشيبه !! خير شو تبا ؟؟

رد عليه وهو معصب : فيه إيه يا عم انته يا عميمي !! هوّا انته ما بتفهمش !! هوَا أنا ما عنديش ناس تانية اروح لها بالمنام غيرك انته !!

أوووم شوف موبايلك جاتلك نيلة !! حد بيرمي موبايله على الارض كده !! يا عم ازا مش عاوزه اديني اياه انا عاوزه !! بلاش هزار يا سعات الباشا وشوف الرسالة اللي جتلك أبل ما تنام !! واللهي واللهي واللهي تلاته يا عميمي !! لو ما عملتش اللي أولتلك عليه !! حتشوف حاجه ما شفتهاش في …

….

وقبل لا يكمل كلامه .. أنا أطالعته بهالنظرات وقلتله : يالله ناش ناش لا تصارخ وتحرطم .. عوذ بالله انته شو عقك عليه ..؟؟
نشيت من الرقاد .. وانا منتهي ومرتفع ضغطي !! دورت التلفون وطبعاً لقيته كالعادة على الأرض والبتري في صوب والكفر في صوب ..

ركبت البتري وشغلت التلفون .. ولقيت مكتوب “رسالة جديدة” .. دخلت الرسالة ولقيتها من رقم خارج الدوله بدايته +44 :

(Congratulation !! You won 500,000$ in ….. )
أنا من شفت المسج .. تــخــبـلت !! وكنت بطير من الفرحة واستويت جي ..
يـــــــــــسسسسس .. والله وابتسملك الحظ يا العميمي وربحت نص مليون !!
يااااهوووووو … وأخيراً .. وأخيراً بقدر أوفي كل ديوني وبعالج بقرتنا المريضة وبقدر أبني مدرسة حق الفقراء اللي في بريطانيا >>> مادري من وين ياني هالتفكير .. لأن ماشالله نحن نحب نسوي خير في غيرنا وننسى عمارنا !!
ساعتها بيني وبينكم .. حسيتني أصلن أنا قدري أني أغدي مليونير وتشوفوني شرات الشواب الهوامير اللي فالأفلام .. كح كح .. احم ..
ظهرت من الحجرة وسويت عمري طبيعي .. ولا كأنه شي صاير .. لحتى ما يعرفون أني ربحت نص مليون !!

نــيـاااهــاااهــاااهــااهـــاااا
سرت الحمام عزكم الله وأنا أركض … والصراحة يبالي بهالمناسبة السعيدة أتسبح وآخذلي دش محترم !!
يا الله .. أول مرة أحس عمري نظيف الصراحة جي .. شو تتحرون عيل !! هذيلا نص مليون مب لعبة أكيد بيخلن الواحد يحس عمره نظيف لا و وسيم بعد ! نياااااهاااااهاااااهاااااهااااا
ظهرت وأنا في قمة النشاط والنظافة والحيوية .. وتخيلت عندي آلة “الهارب” الموسيقية نفس اللي في دار الأوبرا ..

وأنا أعزف عليها ترلللم لم لااااااااه ~~ الوداع أيها الفقر الودااااااااااااااااع ترللللم لم لااااااااااااااه ,,,

واتخيلت الناس تصفقلي وأنا أقول : شكراً شكراً أخجلتم تواضعي ..
المهم .. صليت اليمعة وظهرت من الصلاة ..
وأنا راكب الموتر واقرا المسج .. قريته مره ومرتين وثلاث .. وأنا مب مصدق
ما حسيت إلا بحد يدق على دريشة موتري “طق طق طق” .. لـنـه نفس صاحبنا اللي يطرشلي مسجات “جاك الموت يا تارك الصلاة” ..

نزلت الدريشة وقالي : خاف ربك !! شو تسوي توك ظاهر من المسيد !!

قلتله : لا والله .. لا تفهمني غلط كنت أقرا مسج وحليلي !!
قالي : العميمي عن الجذب خاف ربك تجذب وانته توك مصلي !! هات أشوف التلفون !!

ما وحاله إلا ير التلفون من إيدي وشاف المسج وقال :

ألحين أنته رابح نص مليون !! عيل وهذا المسج ومسحناه وطارت البيزات !! شو تبا أكثر عن جي !!
تخبلت ساعتها !! تميت ارمس عمري !! ها ؟! شو ؟!

و صاحبنا فر التلفون وشرد !! وانا نزلت من الموتر وأصارخ :

فلوسي !! شقا عمري وسنيني .. نص مليون !! طار النص مليون !!

ويلست عالارض من هول الصدمة وأنا أصارخ وأقول : تعال !! تعال وين بتسير عني .. والله ثم والله ما أسامحك وباخذ قضايه منك ..

نشيت وانا أبا أركض وراه بس مب قادر أمشي طارن النص مليون طاااااااااااارت البيزات …

مشيت .. ومشيت .. وما حسيت بعمري إلا أطيح على ويهي !!
بس ما طحت عالشارع !!

طحت من عالشبرية عويهي لأني كنت أحلم شرات الموضوع اللي طاف ..
السموحة طولنا عليكم .. وللأمانة .. وصلني نفس المسج من الدولة الأجنبية ويهنيني بجايزة النص مليون .. ويتني فكرة الموضوع من هالمسج !! كل الشكر لك ياللي مطرشلي المسج واللي بداية رقمك +44
ودمتم ..

9 thoughts on “بـــاركــولــي … ربــحــت نـــص مــلــيــون !!!”

  2. .
    .
    ههههههههههههههههههه خيالك واسع يالعميمي

    عيل الشيبه عنده بي بي

    عــــــاد الحلم كله كـــــوم واللي يقولك ” ياك الموت ياتارك الصلاة” كـــوم ثاني

    ههههه غلاسه ما اتخيّل انه فيه شخص جذي

    مشكور على الحلــــــم .. مرّه ثانيه خل النهايه سعيده يوم انه ع كيفك تحلم
    .
    .

  4. هههههههههههه تحريت استوالك شراتي شفت نص مليون
    ثاني يوم عيد متصلين عليه هنوووود اونه ربحتي نص مليون درهم مال اتصالات وباجر سحبينهن من البنك
    وانتي طالع رقمج ومادري شووو وسوووووووووويت احلام شراتك خلال نص ساعه
    واخرتها اونه طرشي 1500 رصيد عشان نعطيج الرقم
    يقصون على الناس اونه بس ماطافتني خخخخخخ

    تعيش وتحلم غيرها

    بس صدق يوم الواحد يحصل جايزه غييير الشعور

Comments are closed.