السلام عليكم ورحمة الله وبركاته
شحالكم كلكم ان شالله طيبين 
الله يسلمكم من فتره كثرت الاسئله بخصوص مشاريع برؤوس اموال مابين 40 – 100 الف
وطبعا الاغلبيه يبون مشاريع تعود عليهم بارباح جيده ومافيها مخاطره عاليه خصوصا ان اصحاب رؤوس الاموال الصغيره تكون المبالغ اللي عندهم من سلفه من البنك او مبلغ مدخرينه فما يبون ان يخاطرون فيه
فالبعض منهم يستثمر فلوسه بالمحافظ العقاريه والتجاريه بارباح الى 10 % شهريا ويقول هذا كافي
والبعض الثاني يبى هو نفسه يشتغل بفلوسه عشان تصير عنده خبره تجاريه وتكون الارباح اكثر من عشره بالمئه شهرريا فعشان هالشي راح اعرض عليكم الية عمل سميتها بالمشاريع المركبه
وطبعا راح اعطيكم امثله عشان تكون الصوره اوضح واسهل وهالكلام تراه من واقع تجربه عشان تعرفون سهولته لكن يبى له شغل شوي لكن الشغل فيه بيكون حلو لان يعطي الشخص خبره واسعه في مجلات كثيره في وقت واحد
عموما اخواتي واخواني ماطول عليكم وايد وراح اكتب الامثله التجاريه للمشاريع المركبه في الردود عشان مايصير الموضوع مزدحم ويتعب القاريء خصوصا ان مثل مانعرف ان عقل الانسان مايستحمل ان يشوف موضوع طويل ويقراه في وقت واحد بسبب ان العقل يستوعب ان يسوي اكثر من شي في وقت واحد وعند القراءه الطويله العين بتقرا اقل من اللي يستوعبه العقل فيمل العقل ومايكمل الموضوع
ابي اراويكم ان عندي خبره في علم الناس والاجتماع والتنميه البشريه
عموما مابي اطلع من الموضوع وتابعوا الردود ولاي استفسار تراني حاضر ومايردكم الا لسانكم
وفقك الله اخي نايف
غيابك يوحشناوعودتك تفرحنا
ومواضيعك قيمه
جعلها الله في ميزان حسناتك
ما شالله اخوي نايف
مبدع شوي علييك
ومشكوووووررر
عسااك سالم وبالتوفيق وايد فدتنا
مرحبا للمره الثالثه ونتباع
طبعا عرفتوا كيف طريقةالمشاريع المركبه فمباشره بدخل بالمشروع التالي
تخصص المشروع :القطاع السياحي العلاجي
كلمني احد الاخوان من كم يوم بخصوص مشروع براس مال صغير وبارباح جيده واللي كلمني من دوله عربيه بتكون لها طفره سياحيه ان شالله على مستوى واسع ومتخصصه بعد بالعلاج الطبيعي
طبعا موضوعنا يختص بالمشاريع المركبه ف اين بيكون التركيب في مشروعنا الحالي
بيكون الله يسلمكم ان نفتح مكتب سياحه وسفر طبعا كل الاجراءات السابقه من الاتفاق مع الفنادق وشركات الطيران ..
لكن بهالمشروع نفقد شيئين وهم الرعاه + التذاكر فلازم ان نشوف لنا تعويض يعني مو معقوله ان بتكون ارباحنا على الاتفاقات مع الفنادق وشركات الطيران بس ..
فبناء عليه انغير نوعيه الاتفاقات فبتكون الاتفاقات مع مجموعه العلاج المتخصصه من مستشفيات وغيره ان تكون لنا وكاله حصريه لأي شخص يجيهم من دولتنا وفي نفس الوقت لنا نسبه ..
طبعا بتكون في رسوم للسفر والسياحه والعلاج يتم استقطاعها من الشخص اللي بيسافر
طبعا عشان تكون خدمتنا مميزه ونخلي الشخص يجي معانا فلازم نوفر له مرشد سياحي وسياره في الدوله اللي بيروح لها ويتم استقطاعها من رسوم اللي بيسافر
ونصيحه اخواني لاتعرضون خصم على الزبون وتقولون له يمكن ان نزل لك السعر لكن ماراح يكون في مرشد او سياره ….!!!!
لان الشخص اللي يبى يسافر سياحه وعلاج يبى يرتاح ومايتعب لاقصى حد فلازم الخدمه تكون مميزه ومافيها قصور على الزبون
اظن الصوره واضحه وسهله لان في شرح سابق لنا
*** المشروع هذا مجرب بعد لكن مب انا اللي جربته , احد الاصدقاء جربه وتم الاتفاق مع دوله اوربيه على نفس اللي قلت لكم اياه بالضبط والحمدالله نجح مشروعه
وبالتوفيق ان شالله اخواني وان شالله بعد راح اعرض افكار ثانيه بخصوص مشاريع برؤوس اموال صغيره وارباح عاليه وباليات مختلفه ..
وبالتوفيق ان شالله للجميع
نتابع موضوعناا
المثال الاول : من فتره تكلمت اني بكتب مشروع بخصوص المعارض
شوفوا الله يسلمكم الحين بنعرض الية مشروع مركب في قطاع المعارض التجاريه والدوليه
راح ادخل مباشره في الية العمل يعني دراسه مبدئيه مصغره ..
اولا : نحتاج نحدد نوع المعرض ويفضل ان يكون تجاري لبيع المنتجات الاستهلاكيه مثل الملابس الادوات الكهربائيه الاغذيه وماشابه
ثانيا : نحتاج تحديد مكان للمعرض وافضل ان يكون في منطقه مش تجاريه بقوه يعني ماظن ان من عين العقل ان نسوي مثل هالمشروع في دبي لكن نقدر نسويه مثلا في العين او في اي اماره اخرى او اي دولة اخرى
ثالثا: استخراج التراخيص لاقامة معرض بعد تحديد نوعيه المعرض وموقعه
رابعا : استئجار صاله كبيره او مركز معارض لمده تتراوح بين اسبوعين – 4 اسابيع
الحين نبدا بالشغل :
بعدد ماحددنا نوع المعرض نرسل فاكسات واميلات لجميع المحلات الكبرى والصغرى في جميع الدول اللي عندهم اللي بنعرضه بالمعرض وطبعا الكل بيكون عنده لان احنا قلنا بيكون المعرض لشي استهلاكي
فنبدا بالتحديد وانا افضل الدول العربيه عموما ونعطيهم عرضنا ان للمشاركه في هالمعرض ونتكفل لكم ان نجيبكم الدوله والتاشيرات ومدةالمعرض لكن نبى منكم رسوم ونحدد الرسوم تمام ..
2- نكلم شركة طيران ونتفق معاها ان جاينا فوج تجاري للدوله فنبى نخليهم يسافرون على شركتكم ذهابا وايابا لكن نبى نسبه وقدرها مثلا10% من قيمة التذاكر
3- نكلم فندق ونقول له مثل الكلام ان في فوج تجاري بيي البلاد ونبى نتعاقد معاكم ان هم يسكنون عندكم لكن نفس الشي نبى من عندكم رسوم 10% على قيمة السكن
4- بعد مانتمم كل هالاتفاقيات نتجه للرعاه ومانخلي محل صغير اوكبير الا نعرض عليه ان يكون راعي برساله مدروسه ان تخليه يصير راعي وطبعا شوي شغل وتركيز تقدر تلقى لك على الاقل ثلاثه رعاه ..
5- يتم تحديد رسوم لدخول المعرض ماتجاوز خمس دراهم على اقصى حد
طيب بعد هذا كله خلونا نشوف ارباحنا كيف بتصير ..؟؟
بنربح من التجار اللي بييون الدوله عشان يعرضون منتجاتهم ويبيعونها
وبنربح من شركةالطيران ومن الفندق ومن الرعاه ومن التذاكر
يعني المفروض ان يكون اجمالي الربح تقريبا مابين 200 الف الى 1 مليون على ادنى حد ولازم ان الشخص يربح مثل هالمبلغ لان بيكون شغله صحيح فعلى الاقل يحاول ان يحصل رعاه بحدود 50 الف – 100 الف
المهم مابى اطول عليكم بالارقام لكن هالمشروع سهل وانا اسميه مشروع مركب لان في اكثر من مكان للربح ومافيه خساير ونفس المشاريع اللي احبها دوم برؤوس اموال صغيره وارباح كبيره ومصادر دخل متنوعه عشان الواحد يضمن ربحه ..
هالموضوع مجرب ترى وعاد بارباح كبيره واتمنى ان الصوره تكون واضحه
وتذكروا ان الشخص بيستفيد خبره في مجالات السفر والسكن والتجاره والتنظيم ففي اكثر من فايده بمثل هالمشاريع عشان سميتها بالمشاريع المركبه
***** اخواني رجاء انا ارحب بكل اسئلتكم واستفساراتكم بس لحد يسالني شنو هي شركة الطيران اللي نتعامل معاها او عنواين التجار اللي نكلمهم عشان يجون او من هم الرعاه اللي عندهم استعداد ان يرعون
لان انا اكتب هالتجارب وهالافكار والمشاريع عشان الواحد يستفيد منها لاقصى درجه ويسوي له شي لكن مش عشان ان يكون مشروع كوبي وبيست حتى بالشركات وكل شي لازم التاجر يدور ويسال ويشوف وانا حاضر له بأي شي بس ان البعض يقول الموضوع صعب او مايصير او ابي كل شي سهل واضح هذا الكلام مايصير اخواني
لاتزعلون مني انا دوم بحاول ان اشارك معاكم كل الافكار عشان بالنهايه كلنا نستفيد بس لازم بعد الشخص يشتغل شوي عشان تنزل البركه بشغله وحلاله وماله
وبالتوفيق ان شالله وبكتب مثل ثاني بعد للي مايحب الشغل بالمعارض عشان يقدر ان يتحول لتجاره ثانيه