لا أعرف من وين أبدأ لأني مقهور من واقع الاستغلال الكبير للمواطنين وصار خلال الثلاث سنوات الماضية ومازال مستمر
مواطن بل مواطنين كثيرين دخلوا في هذه الدوامـــة
عنده أرض في أبوظبي وعنده قرض مليونين , سار عند الخطوة الاولى في درب الاستغلال , عند الاستشاري
قاله ليش تبنــي فيلا , بن 4 إستثماريات ووحدة رئيسية لك, مساحة الرئيسية 800 متر والأربع كل وحدة 400 متر , المجموع كله بس 2400 متر مربع , طبعا زيادة المساحات فيها زيادة للتكلفة وبالتالي تزيد نسبة الاستشاري ال 4% . المهم الاستشاري قال للمواطن: بس التكلفة بتكون حوالي 10 مليون بعد الخصم وأن المتر ب 4 آلاف درهم بسسسسسسس. قاله كيف أنا عندي بس مليونين القرض , قاله بنسويلك دراسة وبيمولك البنك في الباقي. الدراسة طبعا بأن كل فيلا بتدخل 300 ألف سنويا , يعني مليون و200 ألف في السنة !!!!!!!!!!!
المهم المواطن سار البنك يمول 8 مليون على 15 سنة ’ قالوله أرباحنا 5 مليون, يعني مجموع القرض بس 13 مليون طبعا غير قرض الحكومة بدون فوايد. بعد الحسبة طلع لازم يسدد حوالي 900 ألف سنويا لمدة 15 سنة بس مب مشكلة الفلل بتدخل مليون و200 الف يعني بيصفى لك 300 ألف سنويا.
وطلع المسكين فرحان ووقع وبعد سنتين…………
الاستشاري : كابتن اللعبة 4% من 10 ملايين (خذ بس 400 الف)
المقاول: خذ بس 10 مليون وصافية مايقل عن 3 مليون من المشروع
البنك: أرباح 5 مليون
المالك المواطن : نزلت الايجارات إلى 200 ألف وصار الدخل مايكفي وصار يدفع من جيبه 100 ألف سنوية وبعــد 15 سنة بالله عليكم في جونا هذا شو تسوى الفلل
من المسؤوول عن هذا
أين دور البلدية
أعرف العديد من الناس اللي صابتهم هالقصة
واللي نجى صفاله بربح سنوي 200 الف والمفروض تكون مليون
حسبي الله ونعم الوكيل
إنفينيتي …كلامك 100 % والمواطن اللي الحكومة تعطيه الارض ليعيش فيها ويطمع بالمزيد لازم يتحمل..
بس المشكلة كل حد بيغي يستوي أرررباب ..ومن دخل البنك لايلوم إلا نفسه…إذا بنيت فيلا وملحق مابتتورط أما المجمعات فخليها لاهلها..
اخي الفاضل تحليلك لسوق البناء في ابوظبي ينقصه الكثير
فالحديد احد اسباب ارتفاع اسعار المقاولات في السابق ولم يكن السبب الرئيس
فلا تنسى الطلب الكبير اللي صار على المقاولين
فاي مقاول حتى لو كانت عنده شركة صغيرة بدون مهندس او امكانيات
كان ممكن ياخذ مشروع باكثر من 10 ملايين
فبعد نزول سعر الحديد الكثير من مواد البناء نزلت اسعارها مثل الخرسانات ، الطابوق ،الاسمنت،
مقاولي الباطن، النقل ، الخ
اما عن مواصفات البناء والاجراءات في ابوظبي فهي تعتبر الافضل على مستوى المنطقة لكنها احد
اسباب ارتفاع تكلفة البناء
على العموم الاخوة اللي بنوا ويدفعون حاليا مع الايجار زيادة 100 او 200 الف لمشروع بعد 15 سنه
يسوى الكثير مب خسارة ، بل يعتبر مشروع طيب لشريحة كبيرة من الناس
ثانيا معظم الناس مادفعت دفعة اولى
الارض والقرض من الحكومة والبنك مول الباقي
وين المشكلة
المشكلة ان مجموعة كبيرة من اللي بنو على اسعار غالية ومتورطين بهبوط الايجارات
مضايقين من فارق سعر البناء اللي انخفض لصالح المقاول
فبدل من ان المشروع كان فيلا خاصة ببلاش + 500 الف سنويا في الجيب
صار فيلا خاصة + 4 فلل ايجار + 100 الف للبنك
فالواحد يحمد الله سبحانه وتعالى على النعمة
فالكثير من الناس مستحيل يملك بيت او ارض في ابوظبي ويدفع ايجار طول عمره
فما بالك يملك مجمع سكني ويدفع سنويا 100 او 200 الف وساكن في فيلا 800 متر واربع فلل ايجار
بدون دفعة اولى
والسموحة
أولا أنا معاك أن المالك يتحمل قراره لكن إسمحلي بأن موضوع الاسعار الخيالية للبناء لابد من أن تكون مراقبة من البلدية لأن هاذي الاسعار غير موجودة في أي بلد آخر في العالم
شو رأيك في التصاميم لي يسوونها الاستشاريين ويحطون فيها كميات حديد وخرسانة ماتنحط في بناية بنص البحر, كله عشان يرفع السعر ويرفع نسبته, الاساسات لي يسوونها عندنا تنعمل لعمارات في دول ثانية ولو كانت في سبخــة
ثانيا : إذا فرضنا أن دخل الفلل مليون تتوقع بكم يقدر يبيعها ودينه مع قرض الحكومة يساوي 15 مليون
وأعيد مرة ثانية لو مب خسران ليش صافي دخلي يكون بس 300 ألف سنويا بدل من 800 ألف أو مليون
ثالثا: ياخوي هاذي حالات إستثنائية وماتعمم على الجميع لكن لي صاير في سوق البناء معمم على الجميع
أولا: أي قرار في البنيان ما تم إلا براي المالك و شوره و المفروض إنه ينتبه للمبلغ الكبير اللي بيدفعه لأنه هو الوحيد اللي بيتحمل المسؤولية و كان يقدر يسأل البنك أو الاستشاري في حال ما يابت الفلل المبلغ المطلوب شو المطلوب مني كمالك للارض و الفلل؟
ثانيا: بإمكان المالك إنه يتخلص من الديون ببيع الارض و بيطلع كسبان بعد كذا مليون خاصة اذا سدد الدين دفعة وحدة و هذا الشي معروف بالسداد المبكر
ثالثا: هذا سوق يمكن اليوم نازل و لكن ماتدري سو يستوي باكر يمكن تطلع كسبان!
رابعا: انا ضد تحميل الوافدين مسألة هبوط الايجارات، ياخوي نحنا مواطنين و عانينا من ملاك البنايات و طمعهم اللي ماله حدود.. ناس انطردت للشارع – اتكلم عن مواطنين – و ناس دفعت دم قلبها للايجار و ضجت الدنيا و ملاك البنايات ولا عليهم من حد و لا كانهم تسببوا بأزمة! الشقة غرفتين و صالة في مصفح و صلت للـ 180 الف !! الحين هذا المبلغ تستاجر فيه فلة و الاسعار بعدها في النازل مع دخول وحدات سكنية من جزيرة السعديات. ياخوي تدري أنه في حريم اضطروا ينامون في بعض شوارع بوظبي! تدري انهم كانوا مستأجرين و بسبت ملاك البنايات و تغيير الايجار لأرقام فلكية خذوا اغراضهم للشارع!
ماظنتي الوافدين لهم دخل في هذي المشكلة لا من قريب و لا من بعيد و لكن الملاك جنوا على عمارهم و سبحان مغير الاحوال.. ضاقت عيشة الناس و رفعوا ايديهم بالدعا و الحين الحمدلله تغير الحال