موضوع اثار اهتمامي فى منتدى نسائي..قلت انقله لكم واخذ رايكم بما ان المنتدى هنيه فيه ريال..
السلام عليكن خواتي
البارحه كنت فى السوق – العين-
ولاحظت ظاهره انتشرت وبششششكل ينرفز الشخص الغيور على نفسه وعلى دينه
انا طبعا كنت اتسوق وابا اغراض للعيد..مثل مكياج عطور ودراعيات واكسسوارات ونعول..الخ شغل حريم يعني..بس للاسف
فى كل محل ادخل القى ريال بحرمته!!!…
اول كانت هالظاهره بس عند فئه معينه من الخليجيين وكنا نعيب عليهم (كيف ريال داخل يراكض ورا حرمته وشال العيال فى يده وداخل محل ملابس نسائيه؟!؟!؟!؟؟)
والله مب حلوه…
قسم بالله اني استحي اطلب من اللى يبيع او اللى تبيع اللى اباه..اتم متتغصصه من وجود ريال فى المحل ويانا…والله هاذا شي مب طبيعي
انا نفسي افهم ..كيف الحرمه تسمح لريلها يدخل محلات حريم وياها ويطالع الحريم والبنات يشترن ويفاصلن و يطلبن قياسات معينه ووووو!!!! يعني ما تغار على ريلها من هالجو..
تعرفون اللى يقهر..بعضهم ويا حريمهم ويطالعون اللى داخله واللى طالعه..وبعضهم يسحبون كراسي و ايتمون يالسين !؟؟!؟!؟
مثلا عندكم محل الحريبي اللى فى العين مول…نسائي ليش الريال فيه؟؟
فيه محلات بعد للملابس النسائيه والعبايا … المحلات كلها فللللللل ..ريال بحريمهم !!!
بس ابا اعرف ..ليش؟؟
السموحه اذا جرحت حد بدون قصد بس والله تنرفزت وبغيت اطلع اللى بخاطري واسمع رايكم ..
اكرر اعتذاري من خواتي اللى ممكن كلامي ما يعجبهم…لكن انا ليه وجهة نظر ..واتمنى انها تلاقى احترام من اللى يخالفوني بالرأي
وهاذا رد على وحده من العضوات..
الغاليه العكس مرورج اسعدني وانتي ورايج على العين والراس…
بس اللي يبيع يكون راعي المحل ومفروض عليه مب باختياري..ولو فيه محل ثاني يبيع نفس اللى اباه بس البياعه تكون حرمه والله لاروح له .. لكن الريال يدخل مع حرمته مب لازم..خاصه اذا كان فيه زبونه …يعني حرام من باب اللباقه يطلع شوي واذا حرمته بغته يكاسر فى السعر تزقره..
واذا على مقاس(…)..خلاص راعي المحل درى وعرف (الهندي) ..لازم بعد الريال يدري؟!! لو انه راعي المحل هاذي شغلته لكن بعد بنقول مجبروين .. الريياييل اللى داخلين ويا حريمهم هم بعد لازم يدشون؟!؟!؟
والاخت اللى قالت مكان عام!!! الغاليه انا ارمس عن المحلات النسائيــــــــــة … يعني مب مفتوح على كل من هب ودب من شباب ويهالوه وباقي الفئات المجتمعيه … هاي الاماكن مخصصه لبيع اغراض الحريم …يعني مااااااااااال حريم مب عااااام …
انا ابصراحه اشوف ان احسن للوحده انها تتعلم المكاسر وتدبر حالها ..مثلها مثل باقى الحريم ..ما شالله كلنا نكاسر وابصراحه مكاسر الحرمه يكون غير خاصه فى الاشياء النسائيه مثل الفصوص و حركه الشغل و “على طرف” والا “طرفين” …هاذي كلها تدخل فى سعر العبايه (مثلا) والحرمه ادرى بهالشي ..الريال ياحليله شو خصه والا شو عرفه…يكاسر على مجمل السعر و راعي المحل يخورط عليه ويقول له طلبت وزودت ووووو…. الخ
وبالنسبه للى تاخذ راي ريلها فى لبسها… يعنى المفروض تلبس اللى يناسبها ويلبق لها وهالشي ما تفاوض عليه ريلها والا اخوها …. المفروض ثقتها بنفسها اكبر .. بعدين معقوله على كل شي تاخذ راي ريلها؟!؟!!؟!؟!؟
انزين نحن شو ذنبا …
طيب انتوا تشوفونه عادي انه نشتري ونكاسر و نطلب القياسات اللى نريد قدام رياييل غرب و قبايل!!! اصحاب المحلات مفروضين علينا… بس الرياييل مب المفروض يدخلون اساسا!!!!!! لكنه مسموح …
انا من رايي ….المفروض ان “الكندوره البيضا لها احترامها … مب تتخشش فى محلات النسوان”
انتظر ارائكم..
هالموضووع لو نتكلم فيه من اليوووم لين باجر مابنخلص بس بحاول أختصر الموضوووع
لو المحل فيه حريم والبايعه حرمه ما أدخل
لو المحل في حريم والبايع ريال ما أدخله ولا أدخل أهلي (الأ أذا كان الخياط أو اللي يبيع القماش أدخل مع الأهل لان أغلبه مهنده ولو في آلف حرمه بدخل)
لو المحل في حريم وريايل ما أتوقع بخلي الأهل بروحم داخل بدخل معاهم
بس بعض الأحيان أذا المحل حريم ومحد داخل أدخل ومافي مشكله لان مافي حد داخل
وبصراحه بصراحه أحسن وقت حق للتسووووق والشراي هو الفتره الصباااحيه والسموووحه منكم
والله الحيا المفروض يكون من الله أول شي ومن كل الرجال
دام مستحية من صدق لا تدخل المحل أصلا لأن البائع رجل وتدور محل ثاني، البدائل موجودة دائما
ومثل ما قال ملون المعاني إذا ريال اللي يبيع بدخل المحل ويا حرمتي ومع اهلي بعد وعيالي
وأنا اللي بتكلم وبطلب الثياب والمقاسات وكل شي
واللي مب عاجبها تخلي البائع يطلع أول وأنا بطلع وراه على طول
لكن لو حرمة تبيع طبعا أوقف بعيد حتى عن الباب، يمكن ما أنزل من السيارة حتى
بس يا اخوي مرات الحرمة تكون مجبورة تاخذ من المحل اللي يبيع فيه ريال يمكن أغراضه أرخص والا الشي اللي تباه ما بتلقاه في محلات ثانية
والله مب حلوه…
قسم بالله اني استحي اطلب من اللى يبيع او اللى تبيع اللى اباه..اتم متتغصصه من وجود ريال فى المحل ويانا.
والله الحيا المفروض يكون من الله أول شي ومن كل الرجال
دام مستحية من صدق لا تدخل المحل أصلا لأن البائع رجل وتدور محل ثاني، البدائل موجودة دائما
ومثل ما قال ملون المعاني إذا ريال اللي يبيع بدخل المحل ويا حرمتي ومع اهلي بعد وعيالي
وأنا اللي بتكلم وبطلب الثياب والمقاسات وكل شي
واللي مب عاجبها تخلي البائع يطلع أول وأنا بطلع وراه على طول
لكن لو حرمة تبيع طبعا أوقف بعيد حتى عن الباب، يمكن ما أنزل من السيارة حتى
أنا ما ارضى زوجتي تدخل محل يبيع فيه ريال بروحها .. أن شاء الله فيه ألف حرمه
بعدين لو صغتي الموضوع بلغتج بيكون تأثيره أقوى و أبلغ ..
تحياتي