السلام عليكم
اخواني واخواتي اعضاء ومشرفي المنتدى
لاحظت من بعض الاعضاء اللي يعرضون سياراتهم للبيع
انهم يبالغون بنظافة السياره ومواصفاتها ..
حيث حصل لي موقفين من الاعضاء بدون دكر الاسماء
بس بذكر واحد منهم
واحد عارض سيارته فالمنتدى ومصورنها
ومن نظافتها وصلها السماء
المهم اتفقت وياه على السعر وسرت اشوف الموتر وهو في اماره ثانيه
والله اني تفاجأة من شفت الموتر طلع غير عن المواصفات اللي كاتبنها
والله انه فيه اشياء خربانه ومكسره وصبغ (( وليش ماذكر هالاشياء من قبل ))
يعني المكان النظيف بيصوره .. واي شي خربان او مكسور مستحيل يصوره ..
(( شوفو المواقع الاجنبيه اللي عارض سيارته يصور كل شي حتى الشموخ او العفص والتواير الخ.. ))
يعني خليتني ادق درب ساعة وتطلع السياره غير عن المواصفات المذكوره !! والله عيب
يا اخوان والله هالشي اللي يستوي حرام (( هذا غش ))
لقد ذمّ الله عزّ وجلّ الغش وأهله في القرآن وتوعدهم بالويل، ويُفهم ذلك من قوله تعالى: { وَيْلٌ لِلْمُطَفِّفِينْ . الّذِينَ إِذَا اكْتَالُوا عَلَى النَّاسِ يَسْتَوْفُون . وَإِذَا كَالُوهُمْ أَو وَّزَنُوهُمْ يُخْسِرُونَ } [المطففين:1-3].
عن معقل بن يسار المزني- رضي الله عنه- أنه قال في مرضه الذي مات فيه: سمعت رسول الله صلى الله عليه وسلم يقول: « ما من عبد يسترعيه الله رعية يموت يوم يموت وهو غاشٌ لرعيته إلا حرّم الله عليه الجنة » [رواه البخاري ومسلم واللفظ له].
فارجو من الاخوان اللي بيعرض سيارته للبيع
انه يذكر مواصفاتها بصدق وامانه .. واذا فيها اي عيب يجب ان يذكره بدقه
ارجو ان نرتقي ونتفهم اصول الدين من الحلال والحرام والامانه
مشكور على الموضوع المفيد …
بس انا عندي ملاحظة للكل ..
ليش تتفقون على سعر السلعه قبل لا تاخذها يعني انا لو عارض سيارة و كاتب مبلغ و قدره و قابل للتفاوض لو حد قالي انا خاطري في السيارة و ابا اشوفها نقصلي و انا جاد .. الخ
ما بقوله اتفقنا ولا غير المفرووض تروح بنفسك و اتفق معاه على السعر من بعد ما تعاين السيارة غظ النظر عن الصور
و غظ النظر عن الموصفات المذكورة ..
اللوم يقع عليكم و على البايع نفسه .. انا ماقول مستحيل تحصل حد يكون صادق معاك بكل شي بس المفروض من طرف الشاري انه ما يتعشم بكلام مطروح في الاول و الاخير القرار يعود لك عقب ما تعاين السيارة بأم عينك مش من صور و كلام ..
اعرف انه الدنيا بعدها فيها خير بس هذا حلالك و هذا حلال الناس .. اطلع وتعب نفسك و شوف السلع المعروضه يا تعجبك بعيوبها و تتفقون على سعر اقل او انك تغظ نظرك عنها و تشوفلك سلعه ثانيه تناسبك
الحق ينقال و اذا كلامي غلط نوروني
موفقين بإذن الله … لكم مني أجمل تحية .
صار لي نفس الموقف من فتــرة ،، و من عقبهـــا الصراحة ما فكرت أعاين سيارة عن طريق المنتـــدى ،، قمت أخاف ،،
سار أخوية يعاين موتر في دبي ،، و الفرق بين الصور و الواقع 100% !
خرابات و صبغ و الموتر حالته للــه ،،
الله المستعــــان ،،
والله كلامك صحيح يا خوي انا مره ضربت درب يمكن ساعه وشوي
واخر شي طلع الموتر مصبوغ وبكل برودة اعصاب هذا شي بسيط
مايبين يقول انزين خبرني من البداية قبل لاتعثرني الناس تهتم فالفلوس
ولا هامنها هذا حرام ولا حلال .. تحياتي لك ياخوي
واتمنى من الاداره انه اي واحد يعرض سياره بدون ذكر العيوب
ومدح السياره بما لا فيها ايقاف عضويته الرجاء النضر في الموضوع
الحمدلله والصلاة والسلام على رسول الله وعلى آله وصحبه أجمعين …
ياليت والله يخافون الله شوي وياليت يبيعون بامانه وصدق متسوى عليك هاروحه الى اماره ثانيه وتتفاجا السياره بشكل ثاني
والسمووووووووووووووحه..
جزاك الله خير اخويه على التنبيه، وهذي الأخلاق الواجب انها تكون فينا كمسلمين
وعليه يثبت الموضوع، ويرجى الأخذ بعين الاعتبار ما ذكر في الموضوع، والله ولي التوفيج