اقرا كيفية استيرد السيارات من امريكا او من اي مكان

السلام عليكم ورحمة الله وبركاته

1- معظم المعارض والناس الى تستور من امريكا يتعاملون مع وسيط في امريكا – ياخذ عموله من 3000$ وفوق

2- عند الاتفاق يدفع الشاري قيمة السياره كامله يعني مثلا” لكزس 2004 نصف الترا 90 الف درهم نظيفه مش غرقانه ولا مدعومه ولا فيها اي شي. الا في حالات نادره يكون الوسيط الى في الامارات عنده تاجر في امريكا يصدر له سيارات يقوم بدوره ببيعه له ويستفيد الطرفين.

3- شو الى يضمن انها نظيفه طبعا” الفحص والى يكلف من 200$ الين 500$ كحد اقصى.

4- شحن السياره شحن داخلي من المعرض الين مخزن الحاويات وهذا يعتمد على بعد السياره عن الميناء الى بتنشحن منه واقل سعر 300$ واغلى سعر يوصل تقريبا” 2000$ كحد اقصى.

5- شحن السياره بالبحر معظم شركات الشحن تحسب قمية الشحن على حسب حجم الكنتينر يعني من 20 فوت لين 40 فوت العشرين فوت يشل سياره وسعره تقريبا 2000$ وفوق والاربعين يشل ثلاث سياره بحجم اللكزس وسعره 3550$ وفوق.

6- تامين السياره ضد التلف او الغرق الخ اثناء الشحن اقل تكلفه 0,09% من قيمة السياره يعني لو كانت الساره قيمتها 20,000$ X 0,9 = دولار 180$

7- سالفة الشحن التعامل مع شركات شحن كبيره صعب يعني لازم تتعامل معاهم عن طريق وسيط بالتالي تروح في معمعت تاخر الشحن وحسب خط سير الرحله مال الباخره تخطف اروبا وبعدين افريقيا وبعدين الامارات وبالتالي النتيجه السياره تاخذ اقل فتره من تبخر السفينه 45 يوم واقصر مده 25يوم وهي طبعا من الصعب انك تشحن عليها لانه مكلفه جدا”

يعني مثل حال تذكرة سفر ديركت اغلى من الترانزيت.

8- اخيرا” تدفع رسوم للوسيط الشحن مال الامارات على توصيل الطلب ويعتمد على حجم الكنتينر يعني من 1200 درهم وفوق

9- احسب التكالف على اقل الاسعار الى ذكرتها فوق 90000 درهم +3000$ + 200$ + 300$ + 2000$ +180$ +1200درهم= 112556درهم

يعني لما تلقى سياره لكزس موديل 2004 سعرها 140,000 درهم لاتقول غاليه وخاص انك تبغي تستخدم لانك مستحيل تحصل سياره ارخص الا اذا كان صاحبها محتاج.

10- طبعا” ما ننسى ان السياره على سبيل المثال انشرت في شهر 1-9-2008 لا تستغرب انها تستغرق من 45 يوم الى 90 يوم الين ما توصل كل مادفعت زيادة مقابل الشحن كل ما كانت فترة الانتظار اقل وايضا اسعار الشحن مثل البورصه يوم طالع يوم نازل.

ارجو اني بينت نقطه للناس غافله عنها ان مافي حد بتعطيه مبلغ بسيط ويشتري لك سياره قميتها فوق 100,000 درهم وبوافق الا اذا كان ربحه فوق 15,000 درهم وعنده سيوله يبغي يشغلها.

في النهاية الضامن الله كل شي معرض للخساره. واذا نسيت شي ممكن خد من الاخوان الى يستوردون يضيفه.

*انا صارحه لو ايب سيارات بنفس الطريقه ما برضى بفايده اقل من 15,000 على هذا السعر*

هذا مش راي هذا من تجربه شخصيه.