السلام عليكم ورحمة الله
من فترة حصلت سيارة تناسبني من حيث مواصفاتها
وسعرها كان جيد مقارنة بالأسعار الموجودة حالياً
المهم ، بعد عدة اتصالات مع صاحب السيارة
كان واضح إنه يحاول يفهمني نقطتين :
الأولى : إنه ممكن ينزل بالسعر بما يناسبني
الثانية : إنه مستعجل جداً في موضوع البيع لأنه بحاجة للكاش
طبعاً وبشكل لا إرادي حسيت إنها فرصة لازم ما تضيع مني ولازم أشتري السيارة بأسرع وقت لأني ممكن أشتريها بأقل من السعر اللي كنت حاطنه في بالي

لكن الحمدلله الحمدلله إن السيارة في إمارة وأنا في إمارة أخرى
وبسبب ظروف ومواقيت العمل تأجل لقاءنا أكثر من مرة
وقبل الموعد الأخير قررت إني أسأل عن السيارة في الوكالة
فطلبت رقم الشاصي من البائع واللي بدوره كان يبذل جهد كبير بمحاولة إقناعي أن السيارة قـــــــمـــــــة في النظافة
سرت الوكالة …. وكانت الصدمة
السيارة دخلت الصيانة بأسماء 7 أو 8 أشخاص مختلفين
تعرضت لــ 3 حوادث
آخر حادث كان تكلفة تصليحه 17 ألف درهم
قبل انتقال ملكيتها لصاحبنا كانت ملك لقسم بيع السيارات المستعملة عند وكيل هذا النوع من السيارات (ما بذكر نوع السيارة اسمحولي)
وقبل قسم بيع السيارات المستعملة كانت ملك لشركة إيفيس لتأجير السيارات

طبعاً مثل ما قال الشاعر : كل يوم نتعلم …. من الدنيا دروس
والدرس اللي تعلمته إني ما أصدق البائع في أي كلمة يقولها
إلا لما أتأكد بنفسي
وخصوصاً
إذا كان سعر السيارة … مغري

8 thoughts on “احذروا السيارات المعروضة للبيع … بسعر مغري”

  1. تسلم يا خووي على التنبيه ..

    فعلاً وايدين من الناس يبون ينصبون علينا فالبيع ..

    ومايذكر البلاوي اللي في سيارته

    وللأسف عقب تكتشف انها السيارة فيها بلاوي ..

    نصيحة للجميع ..

    لا تثق في كلام البايع مهما حصل

    وافحص السيارة زين وبعدين لو لك رغبة فيها اشترها

    شو فايدة الواحد يوم يغش في البيعة ؟؟ بس عشان ياحذ مبلغ زيادة ..

    والغش والتدليس حرام في الاسلام ..

Comments are closed.