اتمنا جلد الخرفـــــــــــــــــــان المجاهره

السلام عليكم ورحمه الله

موضوعي الصراحه عن شي يزعج بكل صراحه.

احيد من فتره كانو المعاكسين بالمولات والاسواق وحتى الشوارع يتابعونهم ويزخونهم ويزربونهم بالسجن. وكانت الامور طيبه والحمد لله.

لكن من فتره سمعت هالشي توقف والعلم عند الله ليش!!!!!

من كم يوم دشيت مول ويلست بالكوفي شوب مع الربع نتابع مباراه..وانتبهت الى مجموعه من الشباب الخرفان مثل ما يسمونهم الكل واقفين جدام محل ملابس حريم يتريون بنات يتشرن بالمحل انهن يظهرن …طبعا البنات طولن بالمحل وشكل الشباب كان غلط ويقهر بالقو لانه الكل حتى العمي اللي ما يشوف يعرف انهم محبسين لبنات الناس ويسولفون عند بعض وعيونهم ما خازت عن المحل..تحس باليوع بعيونهم. بلا خوف من الله ومن الناس ولا حيا ولا احترام لكل من يشوفهم…وهم يدرون انه كل من يشوفهم يعرف انهم يتريون البنات..واللي يقهر اكثر انهن البنات اللي ظهرن وهم تبعوهن كانت اشكالهن محترمه وما يدرن انه شي خرفان بالاساس يتريونهن عسب انهم يعاكسونهن.

طبعا هذا بمكان واحد واظن انهم هالاشكال من المجاهرين زادو بكل مكان.

طبعا انا ما اقول اني ما اخطي وغيري يخطي..لكن اللي يزعل بالموضوع هو المجاهره عيني عينك بالمعاكسه وقل الحيا.والواحد ياخذ بخاطره وتظربه الغيره لانهم هالاشكال يتابعون كل انثى تمشي جدامهم حتى لو متغشيه وحشيمه وهم ما يرضونها باهلهم..يعني لو حد زل عاهلهم عادي توصل للدم ويظهرون عيال ناس وفيهم الغيره اذا بتكون عليهم ..ولغيرهم يرضونها .

انا ما اظن السجن هو علاج لهالاشكال…لانه مرات يكون خراب بيت للبعض…والتشهير كذالك خراب بيت…..فانسب شي اشوفه انهم يستاهلونه وان شاء الله يتطبق عليهم…انه الواحد منهم اذا زخوه متلبس يقرعونه عالزيرو .. ويجلدونه مثلا 20 او 30 جلده ويغرمونه…مبلغ غير بسيط. كل هذا بيوم واحد حار بحار…ما اظن بعدها حد منهم بيعيدها ابد…لاني شفت البعض من اللي انسجنو بسبب المعاكسه ردو وعاكسو مره ثانيه.فان شاء الله تكون الاجرائات اشد بالنسبه للمجاهر بالمعصيه عسب يكون عبره لغيره.