السلام عليكم ورحمة الله وبركاته
حبيت اكتبلكم لعل وعسى القى الحل لموضوعي ،
لاني بصراحه مضايجه من الموضوع وايد ، حتى فكرت استعين بدكتور خاص يفهم شخصية ها الولد
ولدي طال عمركم عمره 8 سنوات
انسان اتكالي وايد يعني اذا يبا شيء لو كاس ماي يطلبه من الشغالة ، لو بيدش الحمام ( كرمكم الله ) يبا حد يوقفه لانه يخاف ، وايد يهزب وعصبي ويضارب وخاصه الشغاله تسمعونه اذا واعي بس معصب ومب عيابنه شيء !
طبعاً كل هذا كوم وياي انا كوم ،، ما يسمع رمستي مول كأني ما ارمس ولا انبه لشغله يعني اتم طول الوقت ازعج وشاطه عمري ، سو جيه ولا تسوي جيه واذا طلبت منه مساعده في شيء مستحيل يسويها ، كل شيء بأوامر بصراحه تعبت ،
المشكله خواته اللي اصغر عنه يالسين يتصرفون نفس التصرفات يعني كل ما اقول شيء اسمع كلمة (مابا)
استخدمت جميع الاساليب من مكافآت وجوايز وتحفيز ما فاد
استخدمت اسلوب الضرب ما ينفع
يعني تعبت
حتى الصلاه احاول اكلمه فيها قبل بعد يصلي وياي كمن فرض الحين لا يقولي بعدين ،
بتسألوني وين دور الاب ،
ابوه يداوم في ابوظبي يعني تقريبا غير متواجد الا في الويكند وهو يوم يرجع يكلمه بهدوء ومرات بشده لعل وعسى ينفع وياه بس للاسف
احسن تربيته صعبه ، الله يهديه
مشكله لو كبر على ها الطبع ما برومله ،
بعدين ما يحترم حد موووول من خواتي يعني ما يسوي قدر لاحد ، مشكلتي عاطفية ممكن اتم ما ارمسه بس نص ساعه تلقينه يا واتأسف واسمامحه بس من يكمل كمن دقيقه رد وجلب
ترى طبعه زين ويا الناس وهادي يعني اللي يشوفه يقول ها ما عليه ولا شيء بس في البيت ملعوزني مب بشغبه ، لانه غير مشاغب بس ما يسمع رمستي في شيء
اتمنى القى الحل الشافي لها الموضوع
والله يهديه ان شاء الله
اختي الغاليه ولدج تصرفاته عاديه
بس يمكن لانج متحمله المسؤوليه بسبة غياب الاب فتحسين بالضغط شوي لهالسبب انتي متوتره
ويمكن هالشئ عكس تعاملج ويا العيال لاني فهمت انج ام تسعى للمثاليه في تربية عيالها (ماشاءالله عليج)
فتبين النتايج سريعه ,يعني تبين الاستجابه لأوامرج اسرع وماتبين تسمعين كلمة مابا
عندي سؤال هل انتي تشتغلين ؟فاذا لا
شو الاوقات اللي محددتنها بس للسوالف واللعب ويا العيال والاندماج وياهم بالعابهم او حتى في رمستهم العاديه ؟؟؟؟
كم اخ واخت عنده ؟؟ واعمارهم لو سمحتي ؟!
مثل ما قلت لك أختي .. لا تضغطي عليه بالطلبات .. والتعليمات .. يعني خليه لما يغلط ببعض الأحيان هو يحس بغلطه ..
أو سوي نوع من المقاطعة .. يعني ما تردي عليه لما يغلط .. سوي عمرك زعلانه ..
اول شيء اشكرك على تفهمك ومحاولتك لايجاد الحل اخويه
انا ما اعتبر ولدي صغير ، لاني لو عودته على انه صغير بعده بيتمرد اكثر وبيستوي ولد امه
خاطري اشوفه يروح المسييد ، والله مستعده اوصله لين باب المسيد وانتظره لين ما يخلص صلاه بس ما يرضى يقولي اخاف انزل روحي
بعدين حمرت عيني وكل يوم احمر ، بس اخار شي وقالها البارحع انتي دايما اتعصبين علي ، ما اتكلميني بالزين
مافي فايده اذا انتظرت لانه الحين متمرد وصوته عالي علي
من وجهة نظر شخصية
حل شافي ما فيه .. أختي
بس اللي أعرفه .. من خلال تجربة مع عيال إخواني ..ما ينفع إلا العين الحمرا .. وما أقصد الضرب .. لكن الحزم وعدم التعاطف لما يتصرفون بشكل غير مقبول ..
و ورجاءاً بدون إنتقاد .. >> .. العيل إذا نا نفع معه شي .. معناه الخيزرانة هي الوحيدة اللي تنفع ..
وبعدين موضوع الصلاة .. هذا مافيه تساهل .. بيصلي يعني بيصلي .. لا تعطيه فرصة يتهرب ..
بس أنتي مكبرة الموضوع .. حبتين .. يعني هو بعده 8 سنوات الله يخليه .. لذلك .. لا تضغطي عليه .. سوي .. وما تسوي ..
بس حاسبيه لما يغلط ..
والله يسلمه ويحفظه من كل شر ..ويربى بعزكم