بالبداية
احب اقول للجميع
كل عام وانتم بخير
بمناسبة عيد الأضحى المبارك
اعاده الله على الجميع باليمن والبركات
…
موضوعي عن الابتسامة اللي تكسر الظهر
كم هي جميلة الإبتسامة عندما نراها بوجه طفل صغير
إبتسامته لا تعرف المجاملة ولا تعرف الرياء ولا النفاق
ابتسامته نابعه من القلب
…
هل للإبتسامة ثمن يا ترى ؟
للأسف نعم
لكل شيء ثمن وللأسف الثمن قد يكسر الظهر
كيف ؟؟؟
انا بقولكم
قررت اليوم اروح للقرية العالمية في دبي
قرية جميلة ورائعة بكل ما تحويه الكلمة من معنى
وصار لي تقريبا 5 سنوات ما زرتها
فقلت خلنا نروح اليوم ونستانس
خذنا لفه على القرى العالمية المشاركة
بصراحه رائعة
اشتريت كم من شغله بسيطه واسعارهم كانت شوي عالية
ولكني استخدمت طريقة أم سعيد المشهوره
كم آخر
آخر كم
كم آخر
آخر كم
والحمدلله أخذت بعض الاغراض بأسعار حلوه
او بالاصح طلعت وانا راضي
ورحنا بعدين قسم المأكولات
من زمان ماكليت اكلات هنديه
فقلت خلني اجرب الاكل الهندي
اتذكر اذا طلبت لحم من العاده يحطون شوي فلفل بس العكس كان صحيح
حاطين فلفل وشوي لحم
لذلك ما انحصكم تاكلون بالمطاعم الهندية
…
أعرف طولت عليكم بس ماعليه
سامحوني
…
قررت العب وشوق في قسم الالعاب
رحت وخذيت فيش ب100 درهم
ولما سرنا عند الالعاب تفاجأت بالاسعار المبالغ فيها
كل ما اسير لعبه حق الاطفال قوم بو 7 سنوات احصلها ب20 و25 و30 درهم
يا جماعه شو السالفة ؟
ليش هالغلا الفاحش ؟
يعني ال100 درهم طارت في 3 او 4 لعبات
بصراحه رديت وخذيت ب100 درهم فيش
مالعبت البنيه عدل الا وطارن
بالنهاية قلت خلني اصرف البيزات على ملابس واغراض على الاقل الواحد يستفيد منهم
بس والله تحسفت
شو هالغلاء الموجود ؟
حتى اصحاب المحلات يشتكون بأن الإيجارات غالية
يا ترى شو الحل ؟
شو نسوي ؟
وين نودي عيالنا ؟
هل يا ترى اذا نباهم يلعبون ويستانسون بالقرية العالمية او حتى بالمولات والمراكز التجارية لازم نكسر ظهرنا ؟
انتظر حواركم
اخوكم
ابو شوق
الله يعيييييين
و مشكورين
كل عام وانتم بخير
ما اعتقد العيب في وزارة الاقتصاد
اعتقد العيب في المستثمرين اللي ماخذين القرية العالمية ويأجرونها على اصحاب المحلات
لو رخصوا الايجارات وفرضوا عليهم ينقصون من الاسعار بيكون افضل وبتنجح القرية اكثر
ولا شو رايج ؟
الغلا صاير في كل مكان..
والمشكلة ف الوزاراء وبالذات مال الاقتصاد.. مب قادرين يا خذون لهم موقف من اللي قاعد يصير..
الله يعينا..