* عبالي تماري و كعك ..مع أني بعمري ماحبيتها
* عبالي صبّارة بساحة الروضة بنص الليل .. و قعدة ببلودان
لنقول نفس الحكي يلي منقولو كل مرة : " و الله هوَيات بيردوا الروح "
* عبالي سهرة بجبل قاسيون و القمر كامل مكمّل.. و نحنا عم نقول سبحان مين خلق و صوّر ..
و تجي الفاتورة و نقول كمان متل كل مرة: " فظاعة , شو حراميّة , إيه شو طلبنا ! "
* عبالي إمشي بالبزورية .. ريحة التوابل أشهى من أطيب طبخة . و أشتري خلطة زهورات خَرْج الصَمِد أكتر من الشِرب
* عبالي إمشي بالحارات القديمة الضيقة و أتفركش لمّا يجي ولد من وراي عالبسكليت عم يعيّط " أسّع .. أسّع "
* عبالي دمعة مي من الفيجة .. و كمشة ياسمين عراتلي من الجنينة , آخد نفس عميق و قول اللهم صلّ على سيدنا محمد كامل النور , و الله شي حلو
* عبالي جّمعة كبيرة مع الأهل .. عجقة و ضحك , طوشة و لوشة نق و سق متل حمام مقطوعة ميتو
* عبالي قعدة مع رفقاتي .. ضحك يوصل للسما , غالباً مو لشي بس بيكفي أنو مع بعض لنكون مبسوطين و زيادة
* عبالي خلص هالمقطع .. و أبكي ليطلع كل القهر يلي جواتي عبلدي ..
