االسلام عليكم ..انا في الغربة للعلاج ومليت اكل المطاعم
ممكن طريقه طبخ العيش الابيض وصالونه الدجاج لشخصين لاني سمعت ان طريقة طبخهم سهله…وشكرا مقدما لرباة البيوت
واذا عندكم طريقة طبخ الاكلات الثانية بعد خير وبركة
29 thoughts on “ممكن طريقة طبخ العيش الابيض والصالونة لشخصين”
Comments are closed.
السلام عليكم .. أخوي المحامي، اخوك يوسف في الغربه من 7 سنين … و من خلال تجاربي في الحياة شفت أن وصف عيون اليأس أسهل و أقرب طريقه الى طريقتي، مع احترامي للباقين ..
بالنسبة للمقادير تقدر تقلل في هذه الأشياء
البصل – يكفي بصله واحده
اللومي الأسود .. يكفي حبة وحده
و لا تكثر من الثوم .. كل من الثوم قد ما تروم
بالنسبة للفلفل الحار يكفي نصف قطعه فقط .. اذا تحب الأكل الحار حط حبة كامله .. بس لو احترقت لا تلومني ..
الى الآن أقرب وصف الى طبختي
و دمتم
الريال قال لك يبي عيش وصالونه
ما قال سبوس حق الدياي
بالعافية يا اخوي عليك ما قصروا طباخين المنتدى
ولكن لا تتعلث واونك بالغربة صوغتي اترياها
تحياتي
أختكم
سهمي عالي
للأسف اخوي ما اقدر اساعدك
انا ما اعرف اطبخ بس اعرف آكل لوول
كبير المستثمرين تسوي مقالب في الناس وتتلوم ها؟ حليله الريال فغربة ويبا مساعدة تقوم تعطيه وصفة توديه فداهية .
أنا بعطيك طريقة لعمل العيش الأبيض سهلة وبسيطة بدون ما تشخل العيش
تييب الكمية اللي تبيها مثلا كوب عيش كفاية لشخصين
تغسل العيش وتنقعه فماي لمدة نص ساعة بس
تييب الجدر وتحط فيه ملعقة زبدة أو زيت على حسب الرغبة
تصفي العيش من الماي اللي فيه وتحطه في الجدر بحذر
وتحرك المقدار لين ما تحس ان كل الماي اللي فيه تبخر
وعقب تضيف ماي عالجدر وبحذر لأنه البخار اللي بيطلع ممكن يحرقك
ما تحط ماي وايد بس يكون الماي فوق العيش بمقدار 2 سم تقريبا لأنك ما بتشخل العيش
تحركه بحذر وتصكر الجدر وتوطي على النار لين يتشرب كل الماي اللي فيه
بتلاحظ انه العيش صار فيه مثل حفر اونقط هذا دليل على ان العيش استوى.
ملاحظة لا تنسى تحط ملعقة صغيرة من الملح.
الصالونة
المقادير:
تقطع الدجاجة على حسب الرغبة
عدد 3 بصلات متوسطات تقطعهم صغار
بطاطة متوسطة تقطع مكعبات
جزره كبيرة تقطع مكعبات
2كوسا تقطع مكعبات
أو أي نوع من الخضار تفضلها مب شرط اللي ذكرته
2 لومي أسود
عدد خمس فصوص ثوم
فليفلة حلوة ( مب الفلفل الحار مال كبير المستثمرين) تقطع مكعبات صغيرة
وفي حال الرغبة حبة فلفل حار واحدة فقط
حبتين طماطم متوسطات تقطع مكعبات صغيرة
عدد ملعقتين طعام معجون طماطم
كزبرة خضراء إذا توفرت
بهارات مشكلة
ملح
وزيت
الطريقة :
تحمس البصل في قليل من الزيت لين يذبل البصل وتضيف عليه الدجاج وتحمره لين يتشرب الماي
وتشوف الزيت في قاع الجدر تضيف الثوم المدقوق وتحرك المقادير وعقب تضيف البهارات اللي تبيها
أنا عندي أهم شي الفلفل الاسود يعطي نكهة حلوة للطبخ
طبعا تكون مقصر عالغاز عشان ما تحترق الطبخة
تضيف البطاطس وثم الجزر وتحرك اشوي وعقب باقي الخضار الكزبرة خلها اخر شي
تغطي الجدر لين تحس ان الخضار لانت اشوي ضيف معجون الطماط وحرك وضيف اللومي الاسود
وحرك وعقب حط مقدار كوبين من الماء الساخن عالخلطة وصكر الجدر وخله تقريبا 20 دقيقة لين
تستوي الدجاجة وتلين الخضرة واخر شي حط الكزبرة المفرومة ناعم ,وإذا حسيت ان الصالونة ثقيلة
ممكن اتضيف عليها اشوية ماي.
ولا تنسى الملح .
وبالعافية