أنا شخصيا أرى أن تبني هذا القرار من قبل المسؤولين يعتبر جزء مهم وفعال نحو حل مشكلة التركيبة السكانيه .
نحن وبحمدالله دولتنا تنعم بالخيرات ولا ينقصها شيء وحالنا أفضل بكثير من غيرنا في دول كثيرة …. فقط تنقصنا المبادرة ..
حمله لدعم الإنجاب مهمه … لماذا ؟
تعال نعمل مقارنة بسيطـــــــــــــــة ؟
عناصر المقارنة ( الأول ) مواطن متزوج منذ ثلاثين سنة أو اكثر كبير في السن ( كوالدي ووالدك ) انظر بكل بساطة ما شاء الله كم ولد أو بنت لديه .. ستجد بانه في على ألأقل ابنائه لا يقلون عن السبعة وربما اكثر وبعضهم ما شاء الله لديه ( 12 ) والبعض أكثر من ذلك … السبب بإختصار :
– بساطة الحياة خلال تلك الفترة .
– بساطة الاسعار سواء للمأكل والمشرب أو للمسكن .
– لا توجد رسوم معاملات في كل مكان .
– الحياة التعاونية بين الاقارب والجيران كانت قوية
– وجود بعض الدعم من قبل الحكومة لطلبة المدارس مثلاً كانت توزع الدفاتر ووجبات الفطور وقطع لتفصيل كنادير صيفية وأخرى شتوية مع تكلفة التفصيل مجاناً بدون أي رسوم .
– وغيرها من الامور الاخرى .
العنصر الثاني للمقارنة شاب مواطن متزوج حديثا او خلال العشر سنوات التي مضت .. ستجد أن 90% منهم لديه بالكثير ثلاثة ابناء أو أربعة إلا من رحم ربي فقد زاد عن الاربعة …. لماذا ؟
– لانه أصبح يفكر بان الحياة اصبحت صعبة وبذلك اصبح يحد من الانجاب .
– وأن الاسعار اصبحت جنونية ومرتفعة والحفاظات اصبحت تطلع العين لما يجي مولود جديد .
– ما كان بالمجان ايام زمان بخصوص المعاملات اصبحت اليوم تدفع عليه رسوم .
– الجار اصبح لا يعرف من هو جاره . والاقارب اكتفوا بالمسجات للتهنئة بالعيد أو لأي مناسبة اخرى .
– لا يوجد دعم مثل ايام زمان للطلبه … واصبحت المدارس تكوي الاهالي وتنزف جيوبهم حتى آخر يوم دراسي في السنة . احسب مشتريات طفل واحد في الابتدائية وستصل الى رقم خيالي .
بهذه المقارنة نرى بان معدل الانجاب قل كثيرا والاسباب كل المسؤوليين يعرفونها .. وهذا معناه بان عدد المواطنين في الزيادة قلت .. وعدد الاجانب في الزيادة ارتفعت .. والميزان اصبحت كفتيه غير متوازنتين .
فلذلك يجب أن تكون هنالك حملة وطنية لدعم الانجاب للمواطنين لتشجيعهم على زيادة أعداد المواليد ومن خلاله يزداد عدد المواطنين .
والدعم ممكن أن يكون في عدة أشكال مثلاً :
– رفع قيمة العلاوة الاجتماعية إلى 1.000 درهم .
– دعم الأم الموظفة من خلال تقديم ساعات رضاعة معقولة وتقليل عدد ساعات الدوام الرسمي عليها .. يعني إذا الريال دوامه يخلص الساعة 3 هي تخلص الساعة 2 . وكذلك في بداية الدوام يعطونها ساعة تتأخر عن الريال . ما فيها شيء هي الأم التي تربي الاجيال المواطنة فلابد من دعمها والوقوف بجانبها .
– دعم منتجات الاطفال وخاصة التي يحتاجها خلال الثلاث السنوات الاولى .. وذلك بالتنسيق مع الجمعيات التعاونية عبر إصدار بطاقة للمولود المواطن يستطيع والده الحصول على الخصم في حال شراءه منتجات أطفال كالحفاظات والحليب وغيره من الامور .
– إعطاء أولوية قصوى من قبل الحكومة للمواطن الشاب الذي عدد أبناءه خمسة او أكثر في موضوع الحصول على مسكن مناسب كمنحه
– تخفيض رسوم المعاملات في الدوائر الحكومية إلى النصف للمواطن كنوع من الامتياز له .
والحملة في حال تطبيقها شوف النتائج التي ستتحقق على ارض الواقع في نسبة زيادة المواليد خلال فترة أربع الى خمس سنوات .
ممممـ
ياخوي مب هذا هو الحل الوحيد للتركيبه السكانيه المختلّه عقليا ..
الحين ياخوي الاجانب 4 اضعاف المواطنين ..
يعني لو تحسبها .. موارد الدوله وين تروح ؟
كيف تبغيني انا مثلا [ مثلا مثلا ] .. إني اتزوج و انا موظف راتبي من 9 لـ 15 الف بالكثيييييييييير .. و يكون عندي 4 او 5 او 6 عيال .؟
هذه نقطه ..
النقطه الثانيه تقول و من واقع تجربه .. تقريبا 4 او 5 شباب اعرفهم تزوجوا و اعمارهم بين الـ 24 لـ 26 و طلقوا قبل سنه من زواجهم و حد منهم ما كمّل شهرين .!
و هالشباب عاقلين و دارسين و عندهم ظايف عدله و دخل محترم .. و من اهل الريف [ يمكن نقول إن اهل الريف شوي اعقل يعني ^^ ]
و البنات جامعيات و اعمارهن تقريبا 21 سنه ..
بس للأسف صار الطلاق .؟ ليش .؟ و كيف .؟
[ علامة استفهام كبيره ]
طبعا غير حالات الطلاق اللي اعرفها بسبب شباب طايشين .. << هذاا موضوع ثاني و شاذ ..
نقطه ثالثه :
بتكلم مره ثانيه عن واقع تجربه .. ابويه اللي يطول بعمره عنده 19 ولد و بنت .. و عنده 18 حفيد ..
و نص العايله [ اخواني ] هب متزوجين ( و منهم انا ) ^^ .. و بإذن الله شرات ما هو متعارف عندنا في العايله إنه الواحد يتزوج لما يستقر [ يخلص جامعه او يتخرج من كليه عسكريه مثلا ] ..
و عقبها يبنيله ملحق في بيت ابوه و يعيش فيه لين ما يقدر يبنيله بيت ثاني و و و و تستمر الحياه بكل اريحيه ..
يعني انا مثلا عـآدي اتزوج و انا في الجامعه و لو كان راتبي بحدود الـ 5 آلاف .. لكن أأجل سالفة الانجاب لـ ما بعد التخرّج .. و اعتقد ان هذا هو الصح لأنه انا مب مستعد يكون عندي ولد او اثنينه و ما اقدر اصرف عليهم و الا اخلي زوجتي تشتغل عشان تساعدني في المصروف و العيال ما يلاقون اللي يربيهم عدل و يعلمهم الصح من الغلط ..
المعادله سهله ياخوي .. الأب يشتغل و يكدح و يكسب البيزات .. و الأم تنجب و تربي و تعلّم [ طبعا مع ضرورة وجود الأب بجانبها ]
لكن إنه نقول لازم الام تشتغل عشان تساعد في مصاريف البيت و هي عندها 5 او 7 اولاد << هذا كلام مب منطقي ابدا ..
بأختصار شديد :
إذا تبغي تعدّل التركيبه السكانيه اطرد [ مليون ] اجنبي موجود على بلادنا بشكل غير قانوني ..
و بعدها اطرد ما لا يقل عن نص مليون اجنبي يشغلون مناصب و وظائف لا يستحقونها ..
و بعدها صدقني راح اعزمكم على عرسي في الصيف الياي
المشكلة ان الحياة تفرض ان الريال يقبل ان زوجته تشتغل
وخاصة اللي عندهم عيال وما عندهم بيت ..
من رايي ان العمل الجزئي أو تقليل ساعات عمل المرأة بيكون في مصلحة الجميع
اذا مطلوب منها تنجز شغله 100% براتب (لنفترض) 20,000 درهم
يتجزأ العمل على موظفتين أو موظفين اثنين 50% على 50% براتب 10 آلاف لكل موظف
في النهاية ترى الحرمة يوم تشتغل في الدوام وفي البيت ترى عليها مسؤوليات كثيرة
الريال نفسه ما يتحمل ينعطى اكثر من مسؤولية فتتوقعون ان الحرمة مستانسة على كثر المسؤوليات هاي وتقولون يا تشتغل يا ما تشتغل ودددددهن ما يشتغلن ويتعززن ويتدلعن في بيوتهن بس الحياة ما ترحم
أكيد كل ما كان الزواج المبكر كان أحسن للبنت وللولد بس في زمنا ما ينفع
و كل شي بيد رب العالمين
اقتباس:
تعرفين عندي اخ لما كنا ندور له على عروس عمره 29 وكل مانخطب له وحده يقولون كبير عليها يعني تكون توها 20 او 21 او 19 ماترضى تاخذه لسنه !!! اغلب البنات يبن ريال متقارب بعمرهن يعني فرق بينهن وبينه 3 او 5 مب اكثر والافضل بالنسبه لهن يكون بنفس العمر !!!
اقتباس:
واخويه يبا وحدة في سنة من عمر 24 وطالع ما يبا صغيرة
نحن الود ودنا يعرس اليوم قبل باجر بس هو عنيد على قولته عنده هدف ولازم يحققه والحمدلله اتحقق
وانا حصلت له ابنية حلوة وامورة والكل يمدح فيها وفاتحت البنت والبنت عادي عندها بس هو الله يهديه ما يبا و الحين البنت انخطبت وعرست
وكل ما انقوله عن فلانه وعلانه يقول بعدني مب احين مانقدر نجبره على شي مايباه
اقتباس:
وبعدين انا لمته وايد الله يهداه يعني بيكمل 30 سنه يوم يعرس لين ربي يرزقه بعيال ويفرح فيهم كم بيكون عمره ؟؟!! واذا ربي ما رزقه اول حياته بعيال وقعد كم سنه متى بيلحق يشوفهم ويكبرون قدام عينه ؟؟؟عشان جذا تشوفين بعض الاباء يمشون عدال عيالهم ماتقولين ابوهم !!1 يبين جنه اخوهم ويصير صديق لهم ويفهمهم اكثر من الشايب !!!
اقتباس:
هيه حلو
بنت عمي عرست وهي صغيره وشكلها صغير يوم يشوفون بناتها وياها يتحرونهن خواتها ما يصدقون ان هاي امهم
اقتباس:
انا اشوف كثير من الشباب يبدون اشياء كماليه على اكمال نصف دينهم يعني اول مايشتغل يفكر بالسياره وبعدين السفر وبعدين يبا يستانس متى بيجمع لعرسه ؟؟!!!
اقتباس:
اغلبهم جيه يوم بيون يعرسون يقولون ما عدنا لكن حق اللعبان عندهم
اقتباس:
بالنسبه لعيلتنا اول مايشتغل الشاب نبدا نحثه على العرس يشتري سياره بسعر مناسب وتسده مب لازم فشخره وديون ونرصصصصصصصه بهالجمعيات ونوفر له عشان يقدر يفتح بيت ويدفع حق العرس
اقتباس:
والحمدلله كل عيالنا تزوجو بدون ديون وهذا دور الاهل لا تعودون عيالكم على الديون والبنوك اذا مامسك عمره من اول راتب ماراح يمسك عمره ويعرف يوفر ابدا
وانا اخويه وخوالي الحمدلله عرسوووا بدون ديووووووووووووون وبنوا بيوت
اقتباس:
طبعا انا مب ضد الوناسه وانه يسافر وياخذ سياره ويستانس بكده وتعبه بس كل شي بحدود ولكل شي حد معين اما ان فلوسهم تروح كلها للديون وفي الصناعيه وعلى السفر والخربطه !!! هذا كله ما بينفعه
اقتباس:
والعرس حصن واستقرار للشاب والشابه
أكيد كل شي بحدود
والاعتدال مطلوب
اقتباس:
جني استويت يدتكم وهذربت وايد ههههههههه
كل يوم تعالي واتحفينا بسوالفج الحلوة
الحين المشكله في البنات
يعني عادي اتييب عيال بس منو بيربيهم؟؟
شي طبيعي تخليهم ويا الخدم صح انه مع الايام بيزيد عددنا لو طبقنا هالشي بس بيكون جيل مايتكلم عربي ولايعرف عاداته وتقاليده وهذا كارثه اصعب بكثير من كارثة قلة عددنا
والله انا من الحين افكر في الثانيه وبعدي هب ملاقي الاولي عشان هالشي اعتقد ربي ماوفقني في اني القى الاولى
شو اسوي احب اكون مساهم في زيادة عدد السكان افضل من اكون عاله على الدوله
مشكلة السكن تأخر إنجاب الكثير من الأسر الإماراتية!!
يعني إلي ساكن فغرفه فبيت أبوه ماظني يبا أكثر عن ياهل واحد!!
خلونا نبدا فالسكن وبعدين نتكلم عن العلاوات………