بسم الله الرحمن الرحيم
السلام عليكم ورحمة الله وبركاته

اتمنى رسالتي توصل للمسؤولين في اسواقنا الماليه ..

الموضوع انه عطلة الجمعه والسبت قي اسواقنا الماليه منعت الموظفين من التواصل مع السوق والتداول
ولي يبا يتداول ويتابع اخبار الاسهم او عنده شغله فالسوق المالي شوو يسوي يعني ..
اكثرية المتداولين والموظفين لو تشوف رصيدهم فالسوق والبنك بتحصل الرصيد الي فالسوق اكثر..
يعني هل يعقل انه الوحد فينا من الموظفين يحط حلاله وراس ماله في مكان وهو اصلا مايقدر
يتابعه ولا يدري عنه ولا يتواجد فيه حتى لو فالاسبوع مره
الاجازه وااايد اثرت فينا نحن الموظفين يعني الواحد لازم يشرد من الدوام
عشان يتابع ويشوف شو السالفه .. صح اول كانت الاجازه يوم واحد بس وايد كانت مفيده لنا ونافعتنه وااايد
من حيث تخليص المعاملات مراجعة الوسيط تحويل اسهم و..و…و
ابهاي الطريقه هم منعوو وايد ناس من التداول وابعدوهم من السووق
سيرو شوفو سوق دبي ويين كان و وين صار الحين قبل مافيه مكان تمشي فيه
ولحين فاضي قبل كان يوم الخميس فيه ناس شوي الحين شوفو حاله
لا يوم الخميس ولا السبت خلوها على الله الموجودين فالسوق المتداولين قبل يمكن 70% مواطنين
ولحين يمكن نسبة المواطنين الموجودين داخل السوق 30% ولباقي من الجنسيات الاسيويه وغيرهم
بس شو نسوي امرنا لـ الله فيه ناس ماتبانا نتواجد معاهم ونتداول ..

انا عندي 3 حلول ان شاء الله تنفع ..

1) تغيير الاجازه من الجمعه والسبت الى الخميس والجمعه

2) او ان تكون هناك جلستين صباحيه ومسائيه ساعتين صباحا وساعتين مساءا او حتى ساعه ونص وساعه ونص
وبهذه الطريقه نحن عوضنا اليوم الضايع علينا

3) او ان يكون نفس الشيء يعني الجمعه والسبت اجازه بس في يوم واحد اتكون هناك
جلسه مسائيه مثال: يوم الاثنين او الثلاثاء (منتصف الاسبوع) مدتها ساعتين او ساعه ونص

اتمنى رسالتي توصل لاني اتكلم عن مجموووعه كبيره من الموظفين وليس موضوع شخصي
والسموحه لجميع العاملين في اسواقنا الماليه لاني يالس اخرب على اجازتهم الله يوقفكم ويصبركم
تحياااااااااااتي للجميع
وبالتوفيق

34 thoughts on “عطلة الجمعة والسبت والموظفين ..”

  1. لا نؤيد عودة اجازة اليوم الواحد وماصدقنا السوق يتعافا و السبب اجازة اليومين بعدين

    جميع الاسواق في العالم تؤجز يومين شومعنا الامارات ( على راسا ريشة )

    ( الموظفين راعي البالين كذاب يا ابيض يا اسود و بعدين ماعليكم من كلام الناس 90%

    من الموظفين يتابعون السوق من الوزير للفراش ونعرف اللعبة المستوية ولانجلس انقص

    على عمارنا )

    سأ بعث فاكس مؤيد لهذة الاجازة الى هيئة الاوراق المالية باسم اعضاء منتدى الامارات

  2. السلام عليكم

    اخواني ممكن لحظة اصغاء
    أنا معاكم في كل الي تقولونه
    بس ليش نظرتوا بس حق مصالحكم ونسيتوا الي يشتغلوا في السوق امثالنا
    ليش ما لهم حق في الراحة مثل اليوم الي خذيتوه
    اذا كانت الفكرة في الغاء الاجازه فأنا مب وياكم بس اذا الفكرة بتغيير يوم
    الاجازه فأنا وياكم

    بدون زعل بس لا تكونوا أنانيين !!!

  4. السلام عليكم
    واللة كلامكم عجيب و غريب
    انتو لا يجبكم عجب و لا صيا فب رجب
    الدنيا كلها عندهم يومين اجازة و محد يالس يصيح
    و حتى يوم السوق ينزل محد يقول شي
    انتو تبون كل شي على الجاهز
    يوم كان يوم واحد اجازة كلتو تبون يومين
    و الحين تقولون يبون يوم
    المشكلة ما بتنحل الى بطريقة واحدة و بس
    و انا اعتقد الهيئة و السوق يالسين يدرسونها
    و هي ان الاسهم و الاموال مل يكون عند الوسيط
    و الشرح الباقي ياي ان شاء اللة
    يجب يكون بنك او جهة مستقلة (كليرنج هوس)
    الاموال و الاسهم يكون هناك و المستثمر يبيع و يشتري مع اي مسيط يبى ان شاء اللة يستعمل كل يوم وسيط غير ما دام فاتح حساب عند الوسيط

    مشكوووور اخوي على الرد ..
    ونحن مانبا شرط يومين نحن راضين حتى لو
    جلسه مسائيه على الاقل في منتصف الاسبوع
    وللحديث بقيه ..

  5. سلالالالالالالالامي
    تم ارسال نسخه من الموضوع الى هيئة الاوراق الماليه والسلع
    على شكل اقتراح بأسمي واتمنى اني احصل رد من عندهم ..
    ماعليكم شباب ان شاء الله مابسكت عن الموضوع وبحاول اتصل
    على البث المباشر بعد ..

Comments are closed.