السلام عليكم ورحمة الله وبركاته

طبعا الموضوع اللي شفتوه يمكن عجيب ولكن اللي صار معاي البارحة سايرين سوق عجمان للي عالبحر ومعروف ” بسوق اللنجات الأيرانية ” اعتقد هذا هو المسمى
صراحة وصلت الساعة 9.30 باليل مع الاهل ونزلنا عشان نشوف الصحون واغراض البيت بصفة عامة نفس اللي وصونا ان كل شئ عندهم وبسعر ممتاز

عموما ما كملنا نصف ساعة ولاحظنا الاضواء انطفت وكأن الكهرباء انقطعت ورعاة المحلات بسرعة قاموا يبندون محلاتهم
يا جماعة شو صاير قالو خلاص الساعة 10 باليل السوق يتبند

والمصيبة ان اليهال كانوا يلعبون بين الممرات عاد من بندوا الكهرباء ومن الظلام الموجود في السوق ما شفناهم ويالسين ندور عليهم وآخر شئ بالغصب سمعنا صراخهم وصياحهم وحصلناهم

هل هذا الكلام يجوز يا جماعة الخير ؟؟
تبندون الليتات على الخلق وهم يتمشون داخل السوق بدون سابق انذار ولا اعلان ؟؟

ادارة السوق طبعا بعد صلاة العشاء مب موجودين ولا على بالهم والناطور هو المسؤل عن السوق

يعني لازم في الاذاعة نشكي همومنا ؟
ام نراجع البلدية لإتخاذ اللازم بهذا الشأن ؟

صراحة شئ مخجل جـــداً و وحركة غير حضارية من ادارة سوق عجمان اللنجات

18 thoughts on “** سوق عجمــان ( سوق اللنجات ) متى التطــور **”

  1. ههههههههههههه
    والله صار لي نفس الموقف في نفس السوق
    بس المضحك فالموضوع إني يلست أتكاسر إويا الإيراني والليت مبند
    والأهل يالسين يتحرطمون وآخر شي يوم ربحت الصفقة
    ما عرفت كم عندي فالبوك بس اللي أعرفه إنها نيطان والسلام حاولت أتفلسف وأخمن كم عندي
    بس ما شي فايدة انقهرت وطلعت وقلت الله ياخذ اليوم اللي دشيت فيه هالسوق
    وأنا طالع اتخرطفت وطحت وقمت بسرعة وركبت السيارة وعقالي طايح عخشمي
    الحمدالله إنه ظلام محد لاحظ

    ما فائدة لحن السكينة والأمان ***** في وسط كاس الجهل قد شربت
    عجمان أمي لك كنزاً فالحنان ***** من هذا التخـلف يوماً قد سئـمت
    جنةً عجمان وسط كل الجنان ***** تحتاج فزعتـنا في كل شي طلبـت

    الشاعر/ منصور محمد السويدي
    (بوشهد)

    وصدق الشاعر يوم قال :

    داري ولو جار علي الزمان عزيزة ***** أهلي ولو بخلو عليه كرامو

  3. شو بتحصل من عيمان .. دام بوراشد ساكن فيها ..

    أتصل على البث المباشر في عيمان .. على الأخ بوراشد .. 100% بيطلعك أنت الغلطان لانك مشتكي على سووووق البقر أقصد ( اللنجات الأيرانية ) ..

    أسمع نصيحتي لاتروووح تشتري من هذي الأماكن صح رخيص لاكن مافي كولتي .. أشتري من المراكز .. أخير لك تضمن شئ نظيف .. ومعاملة محترمه محد يسكر عليك الليتات ..

    تحياتي لك

Comments are closed.