السلام عليكم….
أود أن أعرض لكم صوره ولا أجمل من خور نجد التقطها أحد الزملاء معي في الشغل…
ناوين باذن الله انسير بعد العيد بس ما عندي خبره عن المكان
هل المكان ممنوع
هل في مواقع صيد
هل في مواقع غوص حياري
هل في يرايير خطره
هل توجد خدمات مثل دكاكين – ثلج
هل المبيت مسموح
كم مده الطريق من دبي
هل يسمح أخذ الطراد
لا تبخلون بالرد يا شباب واللي ما يقدر يكتب يتصلي على 0506515561
أخوي بن شاهين بطرشلك على الخاص رقم تلفون واحد من الربع من أهل خصب … عندهم طراريد للايجار وأهل بحر يعني يسترزقون … كلمه ورتب معاه … ودمت بخير …
السلام عليكم بن شاهين … أعرف جماعة من خصب وخليني اخبرهم وبرد عليك بخصوص تأجير القوارب ..
شباب محد رد عليه…..
أريد أأجر طراريد عند خور نجد….منو بيوفري أرقامهم
صراحه مشكورين شباب على المشاركات الحماسيه…و ما أظن في واحد يحب البحر و مايحب هذي المنطقه…
اللي بيسير من الشباب في الايام اليايه يقولي وين أقدر أأجر طراد واذا في أرقام تيلفونات خير و بركه
مع احترامي لك ولاقتراحك اخوي دو لكن مب كل موضوع يعجب واحد من الاعضاء نطلب من المشرفين تثبيته ..!!! تثبيت الموضوعات يتم بناء على تقدير المشرفين وهو على ما اعتقد انه يكون الموضوع عام وذو فائدة لجميع الأعضاء بدون استثناء لكن في هذا الموضوع ممكن يعجب ناس وما يعجب ناس .. إذا حبيت تثبت موضوع معين ممكن انك تطرح الموضوع بصورة مختلفة وهو رحلات الحداق أو رحلات الغوص وكل حد شارك في رحلات حداق أو غوص على مستوى الدول العربية أو الدول الخليجية أو حتى دول العالم يطرح الموضوع وبالصور مع شرح عن الأماكن اللي ممكن يتوافر فيها الحداق أو الغوص أو حتى أماكن السكن وأماكن السوبر ماركت القريبة … وكذلك معلومات بالتفصيل الممل عن مكان الحداق أو الغوص مع أرقام التلفونات إذا أمكن … وبهذي الحالة نكون سوينا موضوع مرتب وشامل ويعتبر من وجهة نظري موسوعة لرحلات الغوص أو الحداق وبشكل منسق ومنظم … وفيما بعد إذا حبيت أنا أطلع لمكان مثل خصب على سبيل المثال ادخل الموضوع هذا واقرا التفاصيل ويكون سند لي ودليل لرحلتي …
مع احترامي للجميع ودمتم بخير برعاية الله وكل عام وانتم بخير ومبروك عليكم الشهر …