دو لا تستحق المقارنة بإتصالات….

السلام عليكم ورحمة الله وبركاته

المتسوق يعتبر ثروة الشركات في المقام الاول واي شركة تفكر في النجاح يجب عليها ارضاء المتسوق

ان كان من الناحية الخدمية او الجودة او المصداقية..

وبالنسبة لسوق الاتصالات عندنا مثل ما هوه معروف عندنا شركتين فقط تقدم الخدمه اللي هيه

شركة اتصالات ودو

الاولى والحمدالله اكثر من ثلاثين سنه تقدم الخدمه ما عليها غبار

جميع خدماتها بجوده عالميه وخدمة العملاء من افضل ما يكون ان كان بالتواصل المباشر

او بالطرق الالكترونية وتوصيل الخدمات بعد سريعه ولا تحتاج معاناة

وغير هذا الهم مراكز خدمية تليق بمستواهم كشركة وملتزمة بالتوطين

اما الثانية على قولتهم (دو) واضح من اسمها اول شي انها تعني الرقم الثاني من لغة الاوردو

واللي هيه تعتبر اللغة التجارية للثلاث جنسيات الطاغية على التعداد السكاني في الدولة

والواضح بعد انها تستهدف هاي الفئة ان كان بالتوظيف او التوجه الاعلاني او حتى بادخال لغاتهم

في قائمة الخدمات اللي تقدمها متجاهله حضرتها قانون التوطين…

ومن ناحية مراكز الخدمة اكتفت فقط بالاكشاك في المولات او محلات قرب البقالات حتى ما تعرفه

اذا كان محل للشركة او محل تيلفونات

لا مكان ترتاح فيه ولا اقسام ولا مكاتب للمسؤولين تقدر تتكلم وياهم

غير هذا الموظفين اللي يردون في خدمة العملاء من جنسية آسيوية ما يرمسونك عربي واذا رمستهم

انجليزي ما ينفهم عليهم لغتهم مكسرة لابعد الحدود

اما العرب بعد من جنسية معينه تقوله تيس قال حلبوه وتحسه هوه يكلمك تقول حد يروغه يتكلم بسرعه لا انته تفهمله ولا هوه يفهملك

من فترة طلعت من عندهم رقم فاتوره اجباري على الايفون الصراحه طلعوا روحي وياه كل ما اتصل

على خدمة العملاء أسأل عن البيانات المجانيه والدقايق المحلية والدولية اللي يقدمونها ويا العرض

كل واحد يطلعلي برقم لين ما عرفت راسي من ريولي ورفعولي الضغط

عقب قلت بفتك من بلاهم وبكنسل رقم الفاتوره وباخذ بينات على رقم مدفوعه موجود عندي من قبل

وقالوا لازم تسوي بدل فاقد عشان نعطيك الميكروسيم كرت للايفون قلنا يالله توكلنا على الله

قالي الموظف بينقطع الرقم وبيشتغل بعد نص ساعه وسلمنا الامر..

بعد نص ساعه وساعتين وخمس ساعات ما اشتغل الرقم اتصلت بخدمة العملاء قالوا لازم تنتظر

في خلال 24 ساعه بيشتغل انتظرت وخلصت 24 ساعه كلمتني موظفه قالت لااااا لازم تنتظر 48 ساعه

وانتظرنا وبعد ماشي فايده التيلفون عدالي يطالعني واطالعه ومكان الارسال مكتوب لا توجد خدمه

الصراحه المعامله وياهم مرض ولا انصح حد يتعامل وياهم الا للضروره القصوى

وبالنسبه النا في العين الكشك مالهم بس في العين مول والموجودين فيه (دو) موظفين يعني اثنين

بالعربي اذا تبا تستفسر عن شي والا تدفع فاتوره لازم توقف في الطابور ساعه واذا تبا تكلم مسؤول

لازم تشد حيلك وتسير دبي

وانا استغرب من المطبلين اللي يقارنون شركة دو باتصالات يعني عشان بس لحساب بالثانيه مسوين

هاي الضجه ترا في النهاية الدقيقة بستين فلس ولاحد عندنا يتكلم بالثواني

بعدين معظم الشبكات مستأجرة من اتصالات لو هيه شركة محترمة نفسها كان اسست لنفسها

قاعده قبل ما تدخل السوق وتتجرأ تنافس شركة قائمة اكثر من ثلاثين سنه..

وتقبلوا تحياتي