بسم الله الرحمن الرحيم
اشحالكم جميعا . انا عندي سيارة لكزس موديل 2006 من الفطيم . بعتها لواحد من الاخوان من السعودية . على اساس اصدر له السيارة باسمه .
لحد الحين ما سويت شي وعندي صورة جوازة وصورة الهوية . ممكن حد من الاخوان يفيدني وشي الاجراءات بالضبط لاني اول مره اصدر سيارة .
الشي الثاني هو قال لي في ورقة مقاصة ؟؟ انا مب فاهم وش يعني قال لي بتلقاها فالسيارة بس ما لقيت شي و قالوا لي ممكن تطلعها من المينا؟ اي مينا مب فاهم ممكن حد يوجهني الله لا يهينكم مع العلم اني المالك الثاني .
الله لا يهينكم
اخوي انا جربت وعندي خلفية كامله بخصوص التصدير من الامارات الى دولة خليجية بس عندي اسئلة
بسيطة
اول شي سيارتك تحمل لوحات اي امارة ؟؟
اذا كانت دبي او الشارجه او عجمان بتكون داخله اكثر شي عن طريق ميناء راشد او جبل علي
بس الفطيم اكثر شي ميناء راشد
اذا كانت سيارتك لوحة دبي تسوي تامين تصدير ومن ثم تروح الى اقرب مركز مرور حتى المتواجد في راس
الخور بمنقطة العوير وتخصل امورها كامل من هناك
بخصوص المقاصة بعد ماتحصل شهادة التصدير تسير الميناء وتخلص اورقها
اما اذا كانت داخله عن طريق ميناء ابوظبي نظام ابوظبي مثل قطر وعمان نظام سنتين يعني السيارة
بدون مقاصة
اذا تريد اي مستعد اخبرك من الالف الى الياء
كلام الاخ نايف صحيح ميه على ميه
وهذا المعمول به
تقدر تاخذ مقاصه من ميناء راشد دبي اذا موديل 2005 و فوق واذا كانت السياره واصله على ميناء دبي
وتقدر تشيك عن طريق رقم الشاص او الوكاله يفيدونك
اذا السياره من واصله على ميناء بوظبي تطلع مقاصه لأخر موديلين 2009 و 2010
اقولك هذا الكلام وانا مصدر سياره موديل 2006 في شهر 1-2010
واذا تبغى اعطيك رقم معقب باكستاني في ميناء دبي ترسله بالفاكس ورقه التسفير و صوره الجواز ويخلصها لك ب 100 درهم وتقدر ترسله رقم الشاص ويتاكد لك
ورقم المقاصه : هي اتفاقيه بين دول الخليج بحيث تقتص السعوديه قيمه الجمرك من جمرك دبي والعكس صحيح يعني لو شريت سياره من السعوديه وبتدخلها الامارات تاخذ ورقه مقاصه وتكون معفي من الجمرك ..
اتمنى اكون استفدت من كلامي.. دعواتك لي .. وسجل واحد على العشاااء
واي خدمه واستفسار تواصل معاي ع الخاص .. دمت بود
سيف العز
اسعد الله ايامك اخوي
ولد عمي يشتغل في المقاصه وهو اللي معلمني بالموضوع
يعني معلوماتي 100%100
افا عليك . العشا موجود و الوعد العزبة فالعجبان