ابا كل واحد اتعامل ويا حد من تجار السيارات الواردة
عن طريق منتدى الامارات للأوراق المالية..
يخبرنا اسم الشخص؟؟
وشو السيارة اللي اشتراها؟؟
ومن أي دولة؟؟
وكم المدة اللي وصلت فيها السيارة البلاد؟؟
وشو استعمال السيارة ؟؟
يعني نبا التجربة كاملة …
عشان الكل يستفيد
اخويه aabbcc
السموحة منك بس انا عطيت واحد رقمك و يبا موتر معين و قالي انه اتصلبك أكثر من مرة و ما رديت عليه
و يوم رديت عليه رديت عليه بطريقة كأنه بياخذ عنك موتر ببلاش
ياخويه جان بتحط رقمك ياليت اترد ع الناس اللي تتصل بك
و السموحة منك و لا تزعل هذي مجرد ملاحظة تحياتي لك أخوك عيماني
للعلم هي الشركة لها سمعه ممتازه وما عندهم لعب وعشان تشترك معاهم تدفع 300 دولار تخولك تدخل وتطلع وتشارك في مزادات مباشره او عن طريق المضاربه يعني ان لمتيد
من شروط التسجيل معاهم انك لازم ترسل صورة جوازك عشان يضمنون حقك وحقهم.
والى يعرف حد في امريكا يخليه يسال عنهم وعن مصدقيته لاني انا اشتركت وسالت شخص في امريكا وقال الشركه والنعم بس انا تراني ما اتحمل اي مسووليه تجاه اي شخص يتعامل معاهم.
عن نفسي تعاملت معاهم وكان تعاملهم راقي معاي.
نكمل
طبعا بس تدخل على السياره وتطلع لك مواصفاتها وعيوبها وكل الى فيها يعني لو فيها خدوش بتلقهم مصور وامشر عليه.
1- عشان تقدر تشتري لازم يكون عندك كرديت في حسابك عندهم مبلغ يساوي 10 % من قيمة السياره او قيمة المزايد وبعد متحجز السياره بيرسلون لك رساله عشان تدفع المبلغ كامل, تحوله لهم عند طريق البنك من حسابك الى حسابهم بنظام ترنسفير واير سويفت متعارف عليه في البنوك.
هني يبدا القلب يدق ويدق وهي فلوس ان راحت بعيد منوا بيرجعها……. عشان كذه انا اقول ان التجار يستاهلون لانهم هم يستخدمون نفس الطريقه بس مب كلهم في ناس لهم ربع في امريكا يحولون لهم وهم يشترون بالانابه وناس يدفعون هنيه وتوصلهم سياراتهم لين عندهم.
للعلم انا هب تاجر بس حاولت ويوم شفت ان السالفه يبالها فلوس جان ارد روس وابركن مكاني.
بعد ماتخلص من الدفع ترسلهم اسم شركة الشحن وعنوانها الى في امريكا الى راح تشحن السياره للامارات بيرسلون لهم الاوراق مال السياره.
بالنسبه exporttrader.com تتعامل مع شركةشحن لها سمعتها ومن الموقع تقدر تعرف كم يكلفك الشحن او بمراسلتهم بيردون عليك بالسعر وعلى اي استفسار جربتهم ولقيتهم متعاونين بس في شغله توهق فيها انا وهم نبهون لها في بعض السيارات تكون بعيده والاجوا مال المدينه صعبه ثلوج وبلاوي امطينه يعي بيتخرون لين ما يشحنونها من المدينه الى فيها لين الميناء غير سالفة توقف في الستودع لين ما يلقون لك كنتينر.
يعني سالفة شهرين وثلاث هي من في البحر كله تاخير في امريكا. ماعلينا هذا موقع الشركه.
FREIGHTMAR :::
تراسلهم عن طريق الاميل يردون عليك ويخبرونك عن التكلفه مالت الشحن حتى قبل ما تشري السياره بس تعطيهم رقم lot مال السياره وفي اي معرض او مزاد واقفه يحسبون لك التكلفه لين ميناء جبل على
ملاحظة كل ما زاد عدد السيارات افضل لانه الكنتينر الكبير سعره اقل من انك تشحن سياره مع سيارات ناس ثانيين يعني ثلاث سيارات يمكن يطلعن نفس سعر سياره وحده.
في النهايه
احب اقول انه من خاف سلم يعني انا شخصيا” افضل اتعامل مع اي شخص في الامارات حتى لو الناس قالوا عنه حرامي لاني يوم ابغي اشتكي عليه تراني في بلادي وبشتكي عليه وان شاء الله حق بيوصلني واذا ما وصلني بلقاه عند ربي.
والنجاح دوم ثمنه غالي
ارجوا من الى بستفيد من الشرح الدعاء للوالد بالرحمه وجزاكم الله خير
الله يوفقك الجميع
هذي الشركة موقعها وين بأمريكا بالتفصيل
هل أستطيع الذهاب لمكان السيارات والمزايده على السيارة بشكل مباشر
إلي يشتري سيارة من أمريكا كأنه يشتري سمك بالماء
الموضوع شييق ومفيد للي يبا يشتري سييايير من برع…أنا (واعوذ بالله من كلمة أنا)واحد من الي اتعاملو مع الاخ بوفهد (UAE1010),طلبت سياره وحاليا فالباخره(يايه فالدرب),وبعد طلبت وحده ثانيه وطرشت البيزات وجاري استكمال اجراءاتها…
أولا:المعامله:
–الريال قمه فالاخلاق متجاوب معاك ويبدي اهتمامه للسياره كأنها له,ويعطيك نصايح شو الاحسن لك.
ثانيا:التواصل معاه:
– الهاتف أو الايميل.
ثالثا:طريقة الدفع:
–بعد ما تتفق وياه عل نوع السياره وسعرها , تسلم المبلغ كامل لأخوه الموجود فالامارات ويسلمك جيك بالمبلغ كضمان. وبالنسبه لي اول سياره عملت نفس الطريقه استلمت جيك من أخوه, السياره الثانيه حولت المبلغ عن طريق البنك.
رابعا:مواصفات السياره و حالتها:
–هاي النقطة بعدين ان شا الله بتكلم عنها يوم بتوصل السياره (عقب حوالي اسبوعين من تاريخه 27/7/2008)…
خامسا:مدة أو فترة وصول السياره:
–يعتمد اول شي وهو الاهم من مكان تواجدها بالنسبه للشخص الموجود فأمريكا ..بالنسبه لي كنت ابحث عن السييايير الي قريبه من بوفهد(43615) رمز المنطقه والي تحطه في عمليه البحث, فبمجرد وصول السياره عنده فالمنطقه يجيك عليها ويطرشلك صورها وتقرير كامل عن حالتها,ويشحنها للمينا وانته وحظك اذا حملوها بسرعه ولا انك تنتظر الي ما اييك الدور…ومن تتحمل احسبلها ثلاث اسابيع درب الين مينا جبل علي(دبي).
وسلامتكم
والله لو تثبتونه سنه، ما بتوصلون لشي.