إخواني ترى آنا لا تاجره ولا لي في الأرقام والسالفه كالآتي:-
عندي رفيجتي في الدوام وأصلها من إحدى دول مجلس التعاون، من أكثر من سنه سلفتها 20 ألف لمساعدتها في موظوع عائلي…..المهم من هذاك اليوم وللحين ردت لي فقط 8 آلاف درهم!!!
وقبل إسبوعين فنشوها من عندنا في الدوام، وقررت ترجع بلادها، ولما شفت ورقة براءة الذمه مالتها عندنا في القسم رفضت اوقعها لين تدفع الي عليها، قالت ما عندي كاش بس بعطيج سيارتي لأني مسافره وما بحتاجها وتصديرها وجماركها ما تسوى قيمتها!!
سألت عن السياره وهي هوندا موديل 93 قالولي ما تسوى إلا 5 آلاف!!! قلت يالله شي من البلا ولا كله وأظمن 5 آلاف بإيدي أحسن من ولا درهم.
رحنا المرور عشان تتنازل عن السياره لإسمي فطلبوا زوجها لأن السياره بإسم زوجها، إنتظرنا الزوج كم يوم لين فظى وجا معانا، لكن الظابط ما وافق عالتنازل لأن الرقم ماشي تنازل عليه!! أما السياره عادي!! رفيجتي قالتله الرقم عندنا من زمان وليش الرقم ماشي تنازل عليه؟! قالها لأنه شوي مرتب ويمكن إنتي أصلا بايعه الرقم مش السياره!!! فهمته السالفه وقالتله ساعدنا مارضى!!قالت له ما أبي الرقم قالها رجعيه للمرور وهم بيتصرفون فيه!! ولما إنتبهنا للرقم طلع على هالشكل 14414 أزرق!!
الحين رفيجتي قالت خذي السياره بالرقم لأنج ما قصرتي معانا قبل وإبريني الذمه بس دبري التنازل!!
آسفه صدعت راسكم بس هل يسوى الرقم مع السياره 12 ألف درهم؟ أو 7 آلاف درهم للرقم لأن السياره قالولي ب5 آلاف؟!
وهل ممكن مساعدة أي منكم إخواني في التنازل؟!
شكرا لكم مقدماً
اللهم صلي على محمد وآله وصحبه أجمعين
الحمدلله والصلاة والسلام على رسول الله وعلى آله وصحبه أجمعين
والله يا أخت ظبيه انا عندي لج فكره بس ياليت أيكون في ثقه فريل أربيعتج
يعرض الرقم للبيع وأربيعتج ردتلج 8 آلاف ردرهم يعني باقلها 12 وتسد دينها
مثل ما قلت يعرض الرقم للبيع وطبعا التنازل على المشتري
انا مب خبير أرقام سيارات بس الرقم مترتب امكون من رقمين أظني بيبلج أكثر عن 12 قولي مثلن 16 آلف. اذا بتبيعنه اكثر انتي حره بس لا يغرج الطمع
يبيع الرقم 16 يردلج الفلوس الباقيه من الدين الي على ربيعتج و الباقي لزوج ربيعتج مكافئه على مصداقيته ولا أنتي وكيفج وضميرج
وكانا الله عفورا رحيما
بشوف ريال اعرفه من بوظبي .. لو قدر يسويلج شي برد عليج خبر
لو قالي لا .. العذر والسموووحه منج اختي ..
وموفقه لكل خير يااارب
الله يعينج . . . نادر ما تحصلين حد يسوي خير هالزمان ببلاش … كل واحد يبا مصلحته ..
الي فهمته من كلامج انج انتي مب محتاجه الرقم .. ولا محتاجه السياره … اللهم انج تبين تستردين المبلغ الي سلفتيه ربيعتج .. الي اشوفه انه الي يقدر يشتري السياره بالرقم و يحولها بأسمه …يشتريها .. ويسدد المبلغ الى صاحب السياره .. وبالتالي بيردولج المبلغ + ربيعتج وريلها بيحصلون كم ألف من قيمة السياره المتبقي …
ولا تصدعين راسج .. و حتى لو حد قدر اييبلج التنازل الحين … و حبيتي تبيعني الرقم عقب … بعد بتردين اتدورين حد يقدر يسويلج التنازل على الرقم ..