إخواني ترى آنا لا تاجره ولا لي في الأرقام والسالفه كالآتي:-
عندي رفيجتي في الدوام وأصلها من إحدى دول مجلس التعاون، من أكثر من سنه سلفتها 20 ألف لمساعدتها في موظوع عائلي…..المهم من هذاك اليوم وللحين ردت لي فقط 8 آلاف درهم!!!
وقبل إسبوعين فنشوها من عندنا في الدوام، وقررت ترجع بلادها، ولما شفت ورقة براءة الذمه مالتها عندنا في القسم رفضت اوقعها لين تدفع الي عليها، قالت ما عندي كاش بس بعطيج سيارتي لأني مسافره وما بحتاجها وتصديرها وجماركها ما تسوى قيمتها!!
سألت عن السياره وهي هوندا موديل 93 قالولي ما تسوى إلا 5 آلاف!!! قلت يالله شي من البلا ولا كله وأظمن 5 آلاف بإيدي أحسن من ولا درهم.
رحنا المرور عشان تتنازل عن السياره لإسمي فطلبوا زوجها لأن السياره بإسم زوجها، إنتظرنا الزوج كم يوم لين فظى وجا معانا، لكن الظابط ما وافق عالتنازل لأن الرقم ماشي تنازل عليه!! أما السياره عادي!! رفيجتي قالتله الرقم عندنا من زمان وليش الرقم ماشي تنازل عليه؟! قالها لأنه شوي مرتب ويمكن إنتي أصلا بايعه الرقم مش السياره!!! فهمته السالفه وقالتله ساعدنا مارضى!!قالت له ما أبي الرقم قالها رجعيه للمرور وهم بيتصرفون فيه!! ولما إنتبهنا للرقم طلع على هالشكل 14414 أزرق!!
الحين رفيجتي قالت خذي السياره بالرقم لأنج ما قصرتي معانا قبل وإبريني الذمه بس دبري التنازل!!
آسفه صدعت راسكم بس هل يسوى الرقم مع السياره 12 ألف درهم؟ أو 7 آلاف درهم للرقم لأن السياره قالولي ب5 آلاف؟!
وهل ممكن مساعدة أي منكم إخواني في التنازل؟!
شكرا لكم مقدماً
السلام عليكم إخواني وخواتي…..
الله يرضى عليكم ساعدوني جان تقدرون……للحين إستلمت رسايل خاصه وايد والكل يوعد ولا يوفي؟!!! وصرت ما أعرف من الصادق ومن الكاذب؟!!!! والكثير يطلب مني أبيع له الرقم وعليه التنازل؟؟!! إنزين إذا ما بغيت أبيع الرقم يقولي عيل إسمحيلي إختي ماشي تنازل؟!!!!! وواحد طلب الرقم عشان يظبط التنازل عقولته، ولما عطيته رقم السياره راح طلع رقم زوج رفيجتي من المرور عن طريق رقم السياره وقاله بكل ثقه وبرودة اعصاب ما عليك منها وبيع لي الرقم بالسياره ب 16 ألف وهو بيظبط التنازل!!! عافانا الله شو هالتعامل ووين المصداقيه في التعامل ووين الرجوله في أنه يسوي جي؟!! ولا عشان إني بنت وما عندي سند قال عادي آكل حقها وآخذ الرقم عنها؟!!!!!!!!!!!!!!!!!!!!!!!!!!!!!!!!!!!!!!
وحد منهم إتصلت به وخلاني قريب الإسبوع أنتظر وكل يوم يتصل ونص ساعه يسولف ويشرح صعوبة التنازل ولا يسوي شي؟؟!! قمت ما أرد عليه وقام يطرش مسجات ويزعجني وندمت أني إتصلت من تلفوني!!!!!
والله كنت حاطه أمل كبير بالمنتدى وأعضاءه وقلت لابد يطلع واحد أو وحده منم ويساعدوني….بس للأسف كله كلام!!!!
الله كريم ويسامح كل من وعد ولا وفى!!!!!
السياره والرقم بعدهن موجودات والحرمه أنا عطيتها براءة الذمه وسارت بلادها وزوجها بارك الله فيه تم عند كلمته وقال لي بنتظر عليج لين آخر الشهر وبعدها إسمحيلي بتنازل لج عن السياره ومالي خص بالرقم جان ما قدرتي تدبرين التنازل!!!!!
إذا يرضيكم جي كان بها والحمدلله على كل حال
أعتذر للكل وخاصه المشرف لأن يمكن ها مش مكان مناسب لشكوتي بس حبيت أفظفظ وأقول الي بقلبي ويمكن الي أزعجني يشوف هالموظوع ويحترم نفسه ويبعد عني…أو يمكن حد يقراه ويساعدني ويجزيه ربي خير وإن بغى بيزات عشان يساعدني وفي حدود المعقول مو مشكله.
احس الموضوع عاااااااااااااااااااااااادي دام السياره ورقمها ملك لج ..؟؟ وين المشكله
الموضوع صعب ويحتاج واسطه لو بتعطيج الرقم بسسسسس بدون السياره هني صعب ويبالها واسطه حق التنازل
بس دام السياره بكبرها بتكون بأسمج ويا الرقم عادي بيعي واشتري على كيييييفج …!
وبالتوفيق حبوبه
أستغفر الله
جزاك الله خير ووفق الله الجميع للخير ولمساعدة الغير سواء كانوا رييايـــل أو حريم
أخوي بارك الله فيك….أنت تعلم بأن المرأه كائن ضعيف ويحتاج للمساعده وخاصة في المجالات الخاصه بالرجال….والإخوان حبوا يساعدون لله وما في نيتهم شي ومحد منهم غلط أو طلع بره الخط!!! الله يجزيهم كلهم خير ويعطيهم على قد نياتهم….وما حبيت أبدا تلميحاتك او كلامك وربي يسامحك ويعطيك على قد نيتك!!!
والله الموضوع لوكاتبه ريال جان والله مالقى رد من اي عضو غير التوفيق .. استغفر الله