قصة ولادتي

جايبه لكم قصه ولادتي السهله والميسره والحمد الله

انا من حملت كل يوم ادش بالمنتدى واقراء قصص الولاده ومن كثر ما افكر كيف الولاده

اتعب نفسيا مع اني هذا ثالث حمل لي بس تميت فتره طويله تقريبا 5 سنوات ما حملت

فتره نقاهه
اونه

المهم انا وصديقاتي في الشغل كلنا حمل ونتريا من يولد قبل صديقتي الاولى ولدت

والثانيه معايه هي المفروض تولد بتاريخ 26 / 2 – وانا بولد 27 -2 صار من بينا تنافس

من دخلت الشهر الناسع قمت اشرب يوميا حليب فرش ويا القرفه علشان اولد بسرعه

قبل ربيعتي انصدمت هي ولدت قبلي بتاريخ 10 / 2 يوم عرفت انها ولدت قمت اصيح

ليش تولد قبلي وانا تعبانه في الحمل من الم في ظهري وارتفاع في الضغط ، انا يرتفع

ضغطي يوم ادش التاسع .

يوم الثلاثاء كان عندي موعد مع الدكتوره كشفت علي قالت لي فاتحه من سمعت فاتحه

طرت من الفرح سئليتها كم فاتحه ردت علي نصف سانتي قلت لها بس قالت لي ايه

وعطتني موعد الاسبوع الجاي علشان تفحصني مرع ثانيه وتقولي انتي بعدج عن

الولاده قلت لها ليش زميلتي ولدت قبلي انا وزميلتي نراجع مع بعض عند هاي الدكتوره

المهم شديت حيلي في المشي وشرب الحليب ويا القرفه وجا موعد الدكتوره قلت في نفسي يا الله خير

كشفت ع الضغط طلع عالي وايد وكشفت علي قالت الحين فتحتي 1 سانتي

وقالت لي راجعي مستشفى الحكومي ضروري طبعا هذا يوم الخميس لان الضغط عالي

وخافت عليه عن يصير لي تسمم حمل

يوم الجمعه رحت ازور اهلي يوم شافني ابوي قالي انتي متى بتولدين قلت له بعدني

عاطيني تاريخ 27 / 2 قالي شو صار فيج شكلج تعبانه قلت له مرتفع الضغط عليه ، طلعت

من بيتنا رحت ازور مرت عمي ونفس الشي قالت لي شو فيج يا زهور وعمي يقولي ما

يسوى عليج الحمال شكلج مره تعبانه ومرت عمي تقولي انتي بعدج عن الولاده بطنج

مرتفع وايد وانا مقهوره ليش تقولي جذيه ، المهم بالليل اقول لزوجي ضروري يوم السبت

بروح الطوارئ علشان يكشفون عليه الضغط مرتفع واذا بينوموني مو مشكله اصلا انا

هاربه من المستشفى علشان ما انام افكر ببناتي فديتهم ،كيف بينامون ف البيت مع

ابوهم وانا مش موجوده .

طولت عليكم

المهم رحت انام علشان اصحي بدري والم ثيابي لاني عارفه بتنوم ع الساعه 3.30

الفجر جاني طلق خفيف قلت ف نفسي ليكون هذا طلق خليني انام احسن يمكن احلم

من كثر ما افكر بالولاده بس الالم يجيني قلت لا هذا طلق وكل مره اروح الحمام عزكم الله

صبرت نفسي لين الفجر وع الساعه 6 الصبح قلت للشغاله سخنيلي ماء حار وجابت لي

الماي وحطيت فيه كف مريم وقريت في الماي الادعيه لتسهيل الولاده ويوم برد الماي

شربت منه وقمت امشي والطلقه تجيني وانا اتنافض من الخوف كيف بولد لاني نسيت

ولاده وع الساعه 7.30 الصبح خلاص ما استحملت قومت زوجي قلت له بو فلان انا

شكلي اليوم بولد ، شفت بو الشباب يتنافض بكبره تقول سمجه طالعه من البحر من

الخوف قالي اتجهزي لين ما انا اخلص رحت اصحي اختي قلت لها يا الله اليوم بولد صحي

مرت عمي ولا تعلمين احد حتى امي ، لان امي وايد تخاف قلت بعد ما بولد خبريهم احسن

اتصلت ف مرت عمي فديتها تقول حق اختي البارحه زهور عدنا واليوم بتولد الحمد الله

المهم مسكت الوجع لين اخر لحظه يوم نزلت صمامة الرحم وقلت لهم خلاص ما استحمل

رحنا المستشفى كشفوا الضغط وايد مرتفع وقالوا لي فاتحه 6 سانتي ما شاء الله

بس والله يا بنات ان الطلقه تجيني خفيفه من شربت كف مريم حتى قلت في نفسي

بيقولون بعدج مو فاتحه غير 3 انا انصدمت يوم قالت 6 لك الحمد والشكر بس ما طلعوني

الى غرفه الولاده خلوني في غرفه الكشف لين ما نزل الضغط اشويه وبعدين طلعوني

للغرفه دخلت الساعه 9 ص ويوم تجيني الطلقه اقول للنيرس اسوي بوش تقولي سوي

اقولها بلييز ساعديني افتحي لي راس الماء ما رضت ويوم جت الطلقه سويت بوش وقلت

حق زوجي اطلع لانه داخل معايه ويا مرت عمي وكان ماسك اصابع ارجولي يقولي

ارجولج واايد بارده المهم حبيبي طلع من الغرفه وسويت بوش ولا ماي الراس فتحت

وتجيني الطلقه ورا طلقه اقول للنيرس خلاص بولد تقولي بوش بسم ما الله ما شاء الله

بسرعه ولدت 37 دقيقه وانا ولدت الصراحه اسهل ولاده ف حياتي بدون صريخ انا من

طبعي ما اصارخ دخلت الغرفه 9 ص . ويجي الغالي سلطان 9.37 ص

حمدت ربي ع كل شي بس تعبت اشوي ف غرفه الولاده لان ارتفع الضغط بس الله شاف

حالي والحمد الله يوم شيكت لي النيرس قالت لي ما تحتاجين خياطه

قلت الحمدالله

وهاي قصة ولادتي والسموحه طولت عليكم

الدكتوره عاطتني تاريخ 27/2 وانا ولدت بتاريخ 20/ 2 2010