ياحوامل احذروا حبوب الحديد بدون تحليل ..

السلام عليكم ورحمة الله …
من واقع تجربه وللأمانه قلت لكم ياحوااااااااااااااااااامل .. باختصار لما دخلت الشهر الرابع صرفت لي الطبيبه حبوب الحديد بدون تحليل للدم هل عندي فقر دم او لأ وقد ايه محتاجه هالفيتامينات واستخدمت الحبوب الحمرا وبس بعدنص ساعه تقريبا حسيت بدوخه شدييييده وشعور قوي بالغثيان نفس اللي نعاني منه لما نسافر بس أشد وأقوى بكثير وشوي شوي احس قلبي يخفق بسرعه وصعوبه في التنفس امتديت على السرير احس شبه مغمى علي وحسيت بغثيان شديد ماتحملت رجعت اكرمكم الله وأحس احشائي بتطلع , ورجعت كمان مره ثانيه أصلا مابقي شي بالمعده بس ما وقف هلكت هلكت هلكت من كثر مارجعت وبعد ساعه ونص تقريبا طلع بالمنطقه اللي تحت العين وفوقها زي النمش بس بلون أحمر طبعا وقع قلبي بس قلت باذن الله تروح وبالفعل راحت بعد 3 أيام خفت تدريجيا الى ان راحت والحمدلله طبعا كلم زوجي الطبيب قال هي ماتحتاج هذا النوع المفروض استخدمت النوع المختلط بحمض الفوليك والفيتامينات لأن الحمرا قويييه وانا في الأصل ما احتاجها ..
ولما دورت في النت لقيت اللي صار لي اعراض تسمم بالحديد وزيادة جرعه ودوروا عليها وراح تشوفوا قد ايه خطيره والحمد لله اني رجعت وطلع اغلبها من جسمي ولا كان صار مضاعفات خطيره ..
الكل عارف اهمية الحديد للحامل لكن لازم كمان الوحده تعرف كم النسبه اللي هي تحتاجها قبل ماتستخدمها لأن الطبيبات في العاده يصرفون للحامل مباشرة لما تدخل الرابع بدون مايحللون ..
والله يابنات قلت لكم لأني ماأبي اللي صار لي يتكرر مع وحده منكم وخصوصا لما قريت عن خطر زيادة الجرعه بالحديد ..
اسأل الله ان يحفظنا ويحفظ اجنتنا ويولدون سليمين معافين ..